Azərbaycanın sabitliyə verdiyi dəstək göz önündədir

İtaliyanın Çernobbio şəhərində “The European House – Ambrosetti” kimi nüfuzlu beyin Mərkəzi tərəfindən təşkil edilən Çernobbio Forumu ölkəmiz üçün olduqca mühüm əhəmiyyət kəsb edir. 

Çünki Respublikamızın Prezidenti cənab İlham Əliyevin iştirak etdiyi “Dünya, Avropa və İtaliya haqqında bilgilər” mövzusuna həsr olunmuş sayca 50-ci olan Beynəlxalq Forumdan iki ay sonra Azərbaycan COP29 kimi mötəbər tədbirə ev sahibliyi edəcək. “Gələcək qlobal çağırışlar və onların biznesə təsiri” adlı açılış sessiyasında dövlətimizin başçısının “Yeni geosiyasi vəziyyətdə Azərbaycanın rolu” mövzusundakı çıxışında qeyd etdiyi kimi: “İki aydan sonra biz ən böyük iqlim konfransına – COP29-a ev sahibliyi edəcəyik. Bununla bağlı qərar ötən ilin dekabrında verildi və bizim hazırlıq üçün bir ildən az vaxtımız var idi. Burada ən vacib məqam ondan ibarətdir ki, bu qərar 200-ə yaxın ölkə arasında konsensusa əsaslanırdı. Biz bunu Azərbaycana olan ehtiramın təzahürü hesab edirik. Tarixdə ilk dəfə COP bizim regionumuzda keçiriləcək.” 

Azərbaycanın qlobal arenada müxtəlif aktorlar arasında körpülərin qurulması üzərində fəallığını diqqətə çatdıran dövlətimizin başçısı vurğulayıb ki, hər kəsə məlumdur ki, iqlim mövzusu ölkələri və xalqları ayıran bir mövzudur. Qarşılıqlı iddialar və ittihamlar var – kim planetimizə xələl gətirməkdə daha çox günahkardır, kim daha çox ödəməlidir və sair. Yəni, beynəlxalq arenada qlobal aktor olmasaq belə, zənnimcə qlobal Cənub və qlobal Şimal arasında körpülərin qurulması mümkündür.

Azərbaycanın strateji tərəfdaşlığı məsələsinə toxunan prezidentimiz qeyd edib ki, 120 ölkəni birləşdirən Qoşulmama Hərəkatına 4 il sədrliyimiz onu nümayiş etdirir ki, biz yaxşı nəticə hasil edə biləcək ölkəyik.

Rusiya-Ukrayna münaqişəsi konteksində müzakirələrə münasibətini bildirən ölkə rəhbərimiz deyib ki, bizim xalqlararası və siyasi səviyyədə şaxələndirilmiş münasibətlərimiz var. Bu gün bizim Rusiya və Ukrayna ilə çox yaxşı münasibətlərimiz var. Biz Ukrayna da daxil olmaqla, bütün ölkələrin ərazi bütövlüyünü və suverenliyini güclü şəkildə dəstəkləyirik. 

Bununla yanaşı, biz Rusiyaya qarşı sanksiyalar kampaniyasına qoşulmamışıq və belə bir niyyətimiz yoxdur. Beləliklə, biz praqmatik münasibətlərin mövcudluğu fonunda rol oynaya bilərik...

Prezident çıxışı zamanı bir sıra qərb dairələrinin böhtanlarını, qərəzli mövqelərini də heçə endirməyi bacarıb.

Azərbaycan liderinin real faktlara  əsaslanan çıxışı, moderatorun suallarına verdiyi ətraflı cavablar Forum iştirakçılarının böyük marağına səbəb olub. Çünki haqq tərəfdarı olan Azərbaycanın sülh prosesinə, sabitliyə verdiyi dəstək göz önündədir.

Cəlal ƏLİYEV,

YAP Masallı rayon təşkilatı 

Köhnə Alvadı ərazi partiya təşkilatının sədri