Bakıda Şanlıurfa Mədəniyyət Günlərinin açılışı oldu +FOTO=25

Bakıda "Tarixin Qəlbi Xəzərin Sahilində: Şanlıurfa Mədəniyyət Günləri" çərçivəsində sərgi və mətbuat konfransı keçirilib.

AZpressTİMES.info xəbər verir ki, tədbirdə Türkiyənin Azərbaycandakı səfiri Birol Akgün, Şanlıurfa Böyükşəhər Bələdiyyəsinin sədri Mehmet Kasım Gülpınar, Yunus Emre İnstitutunun sədr müavini Ömer Yıldız, həmçinin hər iki ölkənin nümayəndə heyətləri, mədəniyyət xadimləri və mətbuat mənsubları iştirak ediblər.

Rəsmi hissədən sonra qırmızı lent kəsilərək Şanlıurfa mədəniyyətinə həsr olunmuş fotoşəkillərdən ibarət sərginin təntənəli açılışı olub.

Mədəniyyət bir millətin yaddaşı, onun əsrlər boyu formalaşan ruhunun təcəssümüdür. İki dost və qardaş ölkə — Azərbaycan və Türkiyə arasındakı sarsılmaz tellər yalnız siyasi və iqtisadi sahələrlə məhdudlaşmır; bu münasibətlərin ən dərin və köklü təməlini məhz ortaq mədəni irs təşkil edir. Bakıda İçərişəhərin tarixi küçələrində keçirilən "Tarixin Qəlbi Xəzərin Sahilində: Şanlıurfa Mədəniyyət Günləri" tədbiri bu ruhi birliyin və sarsılmaz qardaşlığın növbəti parlaq təzahürünə çevrildi.

Şanlıurfa təkcə Türkiyənin deyil, bütün bəşəriyyətin ilk yaşayış və sivilizasiya məskənlərindən biridir. "Peyğəmbərlər şəhəri" kimi tanınan, insanlıq tarixinin məlum olan en qədim məbədi Göbəklitepeyə ev sahibliyi edən bu diyarın mədəniyyətini Xəzərin sahilinə gətirmək sadəcə bir tədbir deyil, həm də zamanlararası bir körpü salmaq deməkdir. İçərişəhərin daş divarları ilə Şanlıurfanın minillik sirləri bir-birinə qovuşaraq ziyarətçilərə unudulmaz bir atmosfer bəxş etdi.

Bu mədəniyyət günləri çərçivəsində təqdim olunan zəngin sənətkarlıq nümunələri, özünəməxsus Şanlıurfa mətbəxinin dadları və ruhu oxşayan musiqi ənənələri Azərbaycan tamaşaçısına Şanlıurfanın ruhunu addım-addım yaşatdı. Sərgilənən hər bir əl işində, ifa olunan hər bir xalq mahnısında birliyin, eyni kökdən bəhrələnməyin hərarəti duyulurdu. İnsanlar yalnız bir şəhərin adət-ənənələri ilə tanış olmadılar, həm də köklərinin necə dərin və bir-birinə bağlı olduğunu bir daha hiss etdilər.

Yunus Əmrə İnstitutunun və aidiyyəti qurumların dəstəyi ilə ərsəyə gələn bu cür layihələr xalqlarımızı daha da yaxınlaşdırır. Mədəniyyət günləri göstərdi ki, məsafələr nə qədər uzaq olursa-olsun, könül birliyi və tarixi yaddaş bizi hər zaman eyni nöqtədə birləşdirir. Bakıda səslənən Şanlıurfa nəğmələri bir daha sübut etdi ki, bizim tariximiz bir, mədəniyyətimiz bir, gələcəyimiz isə ortaqdır.

Xeyransa İsmayılova