Masallı oğulları müqəddəs borc yolunda

Vətənə xidmət ən böyük şərəfdir

Respublika Prezidenti cənab İlham Əliyevin 2 sentyabr 2026-cı il tarixli “Azərbaycan Respublikası vətəndaşlarının 2026-cı il oktyabrın 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında” Sərəncamına uyğun olaraq, Masallı rayonunda payız çağırışı davam edir.
Növbəti çağırış günü, oktyabrın 20-də Masallı şəhərindəki Heydər Əliyev Parkında gənclərin müddətli həqiqi hərbi xidmətə təntənəli yolasalma mərasimi ilə yadda qalıb.
Mərasim Ümummilli Lider Heydər Əliyevin və Azərbaycanın suverenliyi, ərazi bütövlüyü uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi və Dövlət Himnimizin səsləndirilməsilə başlayıb.
Masallı Rayon İcra Hakimiyyətinin başçısı Araz Əhmədov çıxış edərək gənclərə şərəfli hərbi xidmət yollarında uğurlar arzulayıb. O, Masallının igid, mərd və vətənpərvər oğullarının müqəddəs Vətən borcunu yerinə yetirmək üçün hərbi xidmətə yola düşdüklərini vurğulayıb: “Masallı tarixən öz mərdliyi, milli-mənəvi dəyərlərinə bağlılığı və vətənpərvər övladları ilə seçilib. Əminik ki, siz də bu şərəfli ənənəni davam etdirəcək, hərbi xidmətinizlə ailələrinizin və doğma rayonumuzun adını uca tutacaqsınız”.
Səfərbərlik və Hərbi Xidmətə Çağırış üzrə Dövlət Xidməti aparatının idarə rəisi, polkovnik-leytenant Füzuli İsmayılov çıxışında Prezident, Müzəffər Ali Baş Komandan İlham Əliyevin rəhbərliyi ilə ölkəmizdə ordu quruculuğu sahəsində mühüm nailiyyətlərin əldə olunduğunu bildirib. O, çağırışçılara hərbi xidmət müddətində nizam-intizamlı olmağı, komandirlərinin tapşırıqlarını məsuliyyətlə yerinə yetirməyi, Vətənə və dövlətə sədaqətlərini əməli fəaliyyətləri ilə nümayiş etdirməyi tövsiyə edib.
Əsgər atası Nahid Rəhimov çağırışçılara xeyir-dua verib, onlara Vətəni layiqincə qorumağı tövsiyə edib. O vurğulayıb ki, əsgər olmaq yalnız hərbi forma geyinmək deyil, doğma torpağa, xalqa və dövlətə sədaqətlə xidmət etmək, Vətənin müdafiəsini ən şərəfli vəzifə hesab etməkdir.
Çağırışçı Əvəz Əsgərzadə Vətənə sədaqətlə xidmət edəcəklərinə söz verib: “Biz Masallının mərd və vətənpərvər övladları kimi hərbi xidmətimizlə ailələrimizin, doğma Masallımızın və bütün Azərbaycan xalqının fəxrinə çevriləcəyimizə söz veririk. Vətənə xidmət etməkdən qürur duyuruq!”
Tədbirin sonunda çağırışçı gənclər müqəddəs üçrəngli Azərbaycan bayrağını öpərək hərbi xidmətə yola düşüblər.
Masallı Rayon İcra Hakimiyyətinin başçısı Araz Əhmədov, Səfərbərlik və Hərbi Xidmətə Çağırış üzrə Dövlət Xidməti aparatının idarə rəisi, polkovnik-leytenant Füzuli İsmayılov, aparatın şöbə rəisi Pərviz Sədrəddinov, SHXÇDX-nin Masallı rayon şöbəsinin rəisi, polkovnik-leytenant Rəfail Xəlilov, eləcə də digər qonaqlar və valideynlər çağırışçılara uğurlu xidmət arzulayıblar. Onlar gəncləri Vətənə layiqli vətəndaş kimi yetişdirən valideynlərə də qürur dolu günlər diləyiblər.
Beləliklə, Masallının gəncləri doğma yurda, xalqa və dövlətə sədaqətlə xidmət etmək, Azərbaycanın müdafiəsində layiqli əsgər kimi iştirak etmək əzmi ilə müqəddəs Vətən borcunu yerinə yetirmək üçün hərbi xidmətə yola düşüblər.

Akif AĞAYEV