Bəybala Mirzəyev: 

Ərdoğanın qəflətdən ayıldığı gecə...

15 iyul 2016-cı il... Qardaş Türkiyənin 8 il öncəki dönüm nöqtəsi...

Həmin gün (daha doğrusu, o gecə) mənfur FETÖ Türkiyədə dövlət çevrilişi etməyə cəhd etməklə bir yandan iblislik, namərdlik etdisə də, ancaq digər tərəfdən isə heç özü də istəmədən Türk xalqına, Türkiyə dövlətinə və şəxsən Ərdoğanın özünə əslində çox böyük bir yaxşılıq da etmiş oldu.

Bəli, bu, ilk baxışdan hər nə qədər paradoksal görünsə də, ancaq təkzibolunmaz bir həqiqətdir.

Bəs, FETÖ-nun istənmədən etdiyi o yaxşılıq nəymiş, nədən ibarətmiş?

Məhz həmin çevriliş cəhdinin baş verməsinin nəticəsində, necə deyərlər, Ərdoğan qəflətdən ayıldı, Fətullah Gülənin gizli məkrli planlarından tam agah oldu və nurçuluqla, gülənçiliklə yollarını ayırdı. Türk xalqı isə FETÖ-nun Türkiyəni siyasi islama sürükləməsindən, teokratik (dini) dövlət qurmağa hazırlaşmasından xəbər tutdu.

Bir sözlə, o gecə həm Ərdoğan, həm də Türk xalqı FETÖ-nun gerçək üzünü tanıdı.

Əgər həmin çevriliş cəhdi baş verməsəydi, biz bu gün Türkiyənin ikinci İrana və yaxud, ikinci Səudiyyə Ərəbistanına çevrilməsinin şahidi olardıq.

Düzdür, Ərdoğan siyasi İslam xəttini bu gün də davam etdirir. Lakin Ərdoğanın siyasi İslamı ilə Fətullah Gülənin klerikal İslamı tam fərqli anlayışlar, konsepsiyalardır.

FETÖ-çu İslamdan orta əsrlərin qoxusu gəlir.

FETÖ-çu İslam biraz ərəb-ortodoksal İslamının, biraz İranın molla İslamının, biraz Misirin "Müsəlman qardaşları" İslamının, biraz da bugünkü Taliban İslamının sintezindən, simbiozundan ibarət yumşaq görünüşlü radikal siyasi İslam cərəyanıdır. Və bu İslamın əsas məqsədlərindən biri də Xilafət institutunu yenidən bərpa etməkdir.

Onlar bu məqsədlərinə çatmaq üçün ilk növbədə məhz Türkiyədə siyasi hakimiyyəti ələ keçirmək planını cızmışdılar. Daha sonra isə Azərbaycanda, Türküstanda (Mərkəzi Asiya respublikalarında) da dövlət çevrilişləri edəcəkdilər. Üçüncü mərhələdə isə digər müsəlman ölkələrində (Qətər, Misir və s.) siyasi hakimiyyətə yiyələnməyi düşünürdülər...

Lakin o gecə Türkiyə üçün dönüş nöqtəsi, FETÖ-çular üçünsə qırılma nöqtəsi oldu. Türk xalqı dövlətinə sahib çıxmaqla FETÖ-nun bütün planlarını alt-üst etdi və oyunu pozdu.