Masallı Olimpiya İdman Kompleksində Lənkəran-Astara Regional Gənclər və İdman İdarəsinin və Lənkəran-Astara Regional Təhsil İdarəsinin rayon sektorlarının birgə təşkilatçılığı ilə “Heydər Əliyev İli” çərçivəsində Masallı rayonunun tam orta ümumtəhsil məktəblərinin X-XI sinif şagirdləri arasında “Vətənin müdafiəsinə hazıram” poliatlon çoxnövçülüyü üzrə rayon turniri keçirilib.

Tədbirin açılış mərasimində əvvəlcə Ulu öndər Heydər Əliyevin və şəhidlərimizin xatirəsi bir dəqiqəlik sükutla yad edilib.

Sonra Lənkəran-Astara Regional Gənclər və İdman İdarəsinin Masallı rayonü üzrə gənclər və idman sektorunun müdiri Sabiq Cahangirov respublikada idmana və idmançılara göstərilən dövlət qayğısından danışaraq yarışın məqsəd və vəzifələri barədə məlumat verib, komandalara uğurlar arzulayıb.

Bildirilib ki, yarışın keçirilməsində məqsəd Ümummilli lider Heydər Əliyev irsinin yeniyetmə və gənclər arasında təbliği, onların vətənin müdafiəsinə mənəvi və fiziki cəhətdən hazırlanması, gənclərdə vətənə məhəbbət və vətənpərvərlik hissinin, hərbə hazırlığın gücləndirilməsidir.

Beynəlxalq Poliatlon Çoxnövçülüyü Assosiasiyasının qaydalarına əsasən 100 metr məsafəyə qaçış, turnikdə dartınma və qumbaraatma növləri üzrə keçirilən yarışlarda 29 komanda iştirak edib.

Turnirin nəticələrinə əsasən Çaxırlı kənd tam orta məktəbin komandası birinci, Ərkivan qəsəbə C.Cabbarlı adına 1 nömrəli tam orta məktəbin komandası ikinci, Mollaoba kənd B.Şiriyev adına tam orta məktəbin komandası üçüncü yerə layiq görülüb. Qalib komandalara təşkilat komitəsinin diplomları ilə mükafatlandırılıb.

Şatıroba kənd M.Əkbərov adına tam orta məktəbin komandasına fərqlənmə diplomu təqdim edilib.

Akif AĞAYEV