Vüsalə Məmmədova:

Xərçənglə mübarizəyə bəzən bütöv bir nəsil qoşulur

Bu gün belə bir xəbər diqqətimi çəkdi. Öyrəndim ki, kollec tələbəsi olan 17 yaşlı model Xədicə Rəhimova ayağını xərçəng xəstəliyindən itiribmiş…

Müsahibəsini tapıb oxudum. Bu zərif qızın əzminə, iradəsinə vuruldum. Sizi tanımaq çox xoşdur, Xədicə xanım! Yolunuz işıqlı olsun! 

Bu gün həm də Beynəlxalq Uşaq Xərçəng Xəstəlikləri ilə Mübarizə Günüdür. Bütün dünyada onkoloji xəstəliklərdən əziyyət çəkən uşaqlara və onların ailələrinə kömək edilir, əhali maarifləndirilir. Bu xəstəlikdən vəfat edənlərin xatirəsi anılır, xərçəngə qalib gələnlərin fədakarlığı qeyd edilir.

Elə xəstəliklər var ki, sən onunla tək mübarizə aparırsan. Ancaq xərçənglə mübarizəyə bir ailə, bəzənsə bütöv bir nəsil qoşulur. Həyatınız boyu belə mücadilə verməmənizi diləyirəm. Yox, əgər bu yolda irəliləyirsinizsə, hər birinizə qalib gəlməyi arzulayıram! Maddi və mənəvi güc diləyirəm.

ÜST deyir ki, hər il dünyada 400 min uşaq və 20 yaşınadək yeniyetmə xərçəng xəstəliyinə mübtəla olur. Təxminən 100 min uşaq isə vəfat edir.

Erkən diaqnoz onkoloji xəstəliklərin müalicəsində mühüm rol oynayır. Alternativ tibb isə xərçəngin yaranma səbəbi kimi həm də doğru seçilməyən qidanı göstərir.

Xəstəliklərdən heç birimiz sığortalanmamışıq. Ancaq ondan uzaq qaçmaq üçün seçimimiz var. Doğru, sağlam qidalananlara istehza edilən bir cəmiyyətdə bu o qədər də asan deyil. Amma övladlarımızın qidasına diqqət yetirə, onların xatirinə öz yediklərimizə fikir verə bilərik.

Bir balaca araşdırma edin, həyatımızı asanlaşdıran “hazır yeməklər” ömrümüzə necə qənim kəsilir, görəcəksiniz…

Bu mövzu mənim üçün o qədər həssasdır ki, yolda qarşılaşdığım məktəblilərin əlində parıldayan bağlamaların içindəki şirniyyatları görəndə kövrəlirəm…

Hər kəs sağlam olsun istəyirəm.

Sevgilər.