Bəybala Mirzəyev: 

Cənubi Qafqazın miskin “Ribbentrop”u…

Pakt nə deməkdir və Paşinyana nə üçün lazımdır?

Ermənistanın baş naziri Nikol Paşinyan bu günlərdə yatıb yuxu görüb və səhər yuxudan ayılandan sonra məğlub ölkənin “ordu günü” ilə bağlı tədbirə gedib, orada çıxış edib və yuxusunu reallıq kimi danışıb, əcaib-qəraib fikirlər, təkliflər səsləndirib.

Təklifləri təbii ki, Azərbaycana ünvanlayıb. Və həmin ağılasığmaz təkliflərdən biri də sülh əvəzinə pakt imzalamaqla bağlıdır.

Bəli, bəli, adam sülh müqaviləsinin imzalanmasının gecikəcəyi halda, tərəflərin bir-birinə hücum etməməsi haqqında pakt bağlamağı təklif edib.

Paşinyan həqiqətən də çox məzəli adamdır. Mən onun bu təklifinə doyunca güldüm. Bir neçə il öncə “Kokeyşın büro” ifadəsi ilə gülüş obyektinə çevrilən erməni baş nazir indi də deyəsən, “pakt” məsələsi ilə üzümüzü güldürməyə davam edəcək.

O, uzun müddətdir dünya diplomatlarının, siyasətçilərin, hərbi ekspertlərin və politoloqların dövriyyəsindən çıxmış və yalnız 20-ci əsrin hərbi-siyasi hadisələri ilə bağlı dərsliklərdə, analitik materiallarda istifadə olunan “pakt” sözünü haradan axtarıb tapıb, bəlli deyil. Nikol bu sözü ya həqiqətən də yuxuda eşidib, yadaki sarsaq məsləhətçilərinin tövsiyyəsi ilə leksikonuna daxil edib.

Bütün hallarda “pakt” sözü bu günkü Cənubi Qafqaz reallıqları ilə əsla uyğun gəlmir. Çünki nə Ermənistan Hitler Almaniyası deyil, nədəki Azərbaycanı Sovet İttifaqı ilə müqayisə etməyin yeri yoxdur.

Paşinyan özünü Hitler Almaniyasının xarici işlər naziri İoahim fon Ribbentropun yerində görürsə, bu başqa məsələ. Paşinyan biraz da irəli gedib hətta özünü Napoleon Bonapartın yerində də görə bilər. Lakin Ermənistandan heç vaxt Almaniya və ya Fransa olmaz. Ceyhun Bayramovun da özünü İlham Əliyevin tapşırığı ilə keçmiş SSRİ-nin xarici işlər naziri Vyaçeslav Molotov kimi aparıb Ermənistan tərəfi ilə hər hansı bir pakt imzalamaq fikri yoxdur.

Ümumiyyətlə, “pakt” sözündən sonuncu dəfə keçən əsrin 60-70-ci illərində (“Soyuq müharibə”nin qızğın vaxtlarında) istifadə olunub. SSRİ-nin çöküşündən və Varşava Müqaviləsi alyansının dağılmasından sonra isə artıq heç kim heç kimlə pakt imzalamır. Yalnız bir neçə beynəlxalq paktlar mövcuddur – məsələn, Mülki və siyasi hüquqlar haqqında Beynəlxalq Pakt kimi. Vəssalam.

Görünən budur ki, Paşinyan zehniyyət etibarilə hələ də 20-ci əsrdə ilişib qalıb.

Hə, birdəki, bu hiyləgər erməni “sülh müqaviləsinin bağlanmasının gecikdiriləcəyi ortaya çıxarsa, hücum etməmək haqqında pakt imzalamağı” təklif etməklə əslində bizə kələk gəlməyi düşünür.

P.S.

Pakt imzalamağa gücü yetən, siyasi iradəsi çatan bir adam sülh müqaviləsini də imzalaya bilər. Əgər o bunu etmirsə və əvəzində pakt məsələsini ortaya atırsa, demək ki, Ermənistanı revanşizmə hazırlayır. Yəni ki, eynən Hitler Almaniyasının Sovet İttifaqına qarşı davrandığı kimi bir yandan Azərbaycanla bir-birinə hücum etməmək haqqında pakt imzalayır, o biri yandan isə altdan-altdan Azərbaycana qarşı hücuma hazırlaşır. Pakt isə Paşinyana sadəcə vaxt qazanmaq üçün lazımdır. Onun sülh ritorikasına, sülhsevərlik oyunlarına əsla güvənmək olmaz!