Bəybala Mirzəyev: 

“Əcinnə” axtarışı…

Dünənki dəhşətli partlayışdan sonra indi cənub qonşumuzda hamı səbəbkar, günahkar axtarışına çıxıb. Söhbət İranın Kirman şəhərində SEPAH-ın Qüds qüvvələrinin keçmiş komandiri Qasım Süleymaninin anım günündə, onun dəfn olunduğu qəbiristanlıqda baş verən iki partlayışdan gedir.

Qasım Süleymani get-gedə iranlıların bəla mənbəyinə, “qara kabus”una çevrilir. Onun dəfnində də basırıq nəticəsində bir xeyli insan ölmüş və ya xəsarət almışdı. Dünənki partlayış nəticəsində isə 100-dən çox iranlı ölüb, 200-dən çox insan yaralanıb.

Lakin bu terror hadisəsinə görə məsuliyyəti heç bir ölkə, heç bir qruplaşma üzərinə götürməyib.

Əvvəllər bu cür hadisələr baş verəndə İranın rəsmi şəxsləri dərhal ABŞ-ı və İsraili suçlayan açıqlamalar verir və hadisə ilə bağlı sərt cavab veriləcəyini, qisas alınacağını bəyan edirdilər.

Bu dəfə isə antisionist ritorikaya rast gəlmədik. Heç “Məhv olsun Əmrika!” şüarı da eşidilmir.

Əksinə, İranın ali dini rəhbəri, ayətullah Xamenei Kirmanda törədilən bombalı hücumla əlaqədar etdiyi çağırışında hərbçiləri, o cümlədən SEPAH-ı “strateji səbir” göstərməyə və ölkəni ABŞ-la birbaşa hərbi münaqişəyə sürükləməkdən çəkinməyə çağırıb. O, həmçinin İsrailə qarşı cavab əməliyyatlarını və İranyönümlü proksi-qrupların ABŞ bazalarına hücumlarını məhdudlaşdırmağı da əmr edib.

Xameneinin bu çağırışı xüsusi maraq doğurur. Və bu da maraqlıdır ki, Kirmandakı qəbiristanlıqda törədilən terror aktının mümkün səbəbkarı kimi İŞİD-in və ya hansısa digər terror qruplaşmasının elan ediləcəyi gözlənilir. Kirman qubernatorunun təhlükəsizlik üzrə müavini də partlayışların məhz terror xarakteri daşıdığını bildirib.

Bu arada Ağ Evin Milli Təhlükəsizlik Şurasının Strateji Kommunikasiyalar üzrə koordinatoru Con Kirbi də İrandakı terror aktının arxasında ABŞ-ın və İsrailin dayanmadığını bildirib.

Görünən budur ki, hazırda nə İran, nədəki ABŞ bir-birilə açıq qarşıdurmaya getmək fikrində deyil. Ona görə də “əcinnə ovu”nun terrorçular arasında axtarılmasına qərar verilib.

Ancaq Kirmandakı terrorun məsuliyyətini İŞİD-in boynuna qoymaq fikri də ağıllı addım deyil. Çünki İŞİD artıq bir neçə ildir ki, iflasa uğrayıb, mövcudluğunu dayandırıb…

P.S.

İnsanı bütləşdirmək olmaz. Əsla olmaz! Molla rejiminin Süleymanini bütləşdirməyinin əzabını sıravi iranlılar çəkir. Həm dəfndə, həm də anım günündə yüzlərlə dinc iranlının həlak olmasının və ya xəsarət almasının bir səbəbi, bir günahı da məhz mollaların adı terror işlərində hallandırılan generalı bütə çevirməyindədir.