Rəşad Məcid: 

Bir mahnının gücü

Deməli, bir fərqli musiqi, bir qeyri-adi mahnı hətta dünyanın indiki gərgin dönəmində də insanları xoş təsirlə ovsunlamaq, diqqəti müəlliflərə və onların mənsub olduğu xalqa yönəltmək gücünə malik imiş...

Neçə gündür, başqırd “Ay yola” qrupunun “Humay” mahnısı çox geniş auditoriyanı, sosial şəbəkələri öz sirli cazibəsinə salıb. Milyonlarla baxış olan bu mahnı haqqında minlərlə təqdir və təhlil paylaşılıb.

Qədimdən gələn ilahi ab-hava, sehrli aura, mistik musiqi başqırd xalqını sanki dünyaya yenidən tanıdıb. Qədim başqırd dastanı “Ural-Batır” qəhrəmanına həsr olunmuş, doğma dildə səslənən misralarla, qədim alətlərlə müşayiət olunan ecazkar musiqi başqırd gənclərində ana dillərinə, tarixlərinə güclü maraq oyadıb. Dünyanın bir mahnıya heyrəti başqırdlarda milli özünədərk hissini xeyli gücləndirib.

Hətta ruslar bu populyarlığı öz adına çıxmağa çalışır, bunu rus musiqisinin uğuru kimi təqdim etməklə guya qısqanclıqlarını gizlətmək istəyirlər.

Mədəniyyətin sirli gücü burdadır: milyonlarla vəsait xərclənib qurulan təbliğat belə başqırd xalqına bu qədər maraq yarada, onu populyar edə, diqqət mərkəzinə gətirə, bu dərəcədə müsbət yöndə təqdim edə bilməzdi. Bir mahnının gücü başqırdları milli oyanışa, ana dilini və milli tarixi dərindən öyrənməyə yönəldib.

Mahnının populyarlıq dalğasında tarixin incələnməsi, bu rəylərdə başqırd xalqının böyük oğlu Zəki Vəlidi Toğanın adının səslənməsi və onun Türk dünyasıyla bağlı ideyalarının xatırlanması da diqqətimi çəkdi. Uğurlar olsun, "Ay yola"!

* * *

Antiqa Qonaq

Tamamilə doğru fikirlərdir. Mədəniyyətin sirli gücü bu olsun gərək. Musiqi xalqlar arasında tərcüməsiz anlaşılan bir mədəniyyət növüdür.

Firuze Memmedli

İzahat və mahnının incəliklərini təhlilinizdən mahnı barəsində tam təsəvvür əldə etdim.çox sağ olun.Neynim ki, eşitmə problemim ömür boyu musiqi sıdaları ilə cilvələnən rubumu korşaltdı.heç bir musiqini eşidib dərk edə bilmirəm.mənim üçün bundan böyük itki yoxdur.

Var olun...incəsənət,mədəniyyət xalqların yüksəliş yolidur. Lap qəbilədən tayfaya, tayfadan xalqa, ondan millətə inkişafın açıq qapısıdır heyif ki, bunu hamı dərk edə bilmir...

Shemsiye Kerimova

Musiqinin dili olmur, sərhədləri aşır, ruhları oyadır. Musiqi ən gözəl siyasıtdir, desək.... halal olsun, "Ay yola ". Siz də sağ olun, Rəşad müəllim, çox gözəl şərh etdiniz.

Əfşan Yusifqızı

Mən sizin bu yazını oxuyub, dinlədim. Çox sağ olun.

Bir də neçə gündür türk serialından trend olan musiqimiz var. Bizim YAŞA MƏNİM XALQIM mahnımızı səsləndiriblər. Adam dinlədikcə qürurlanır, kövrəlir.

Cabbar Əhmədov

İnsanın genetik kodunu oyadan musiqi.. çox sağ olun Rəşad müəllim. Yoxsa bizim musiqilər ,sanki bizi yatmağa sövq edir...Ümid edək ki, bizlərdə də belə möhtəşəm musiqilər yaranacaq.

Gülnar Əsədli

Musiqinin sərhədi yoxdur deyirlər,amma bu melodiya seyrçiyə eıə təsir bağışlayır ki,sanki anlaşılan dildədir..

Bizim bir çox müğənniciklərin oxuduğu bayağı mahnını dinləməkdənsə ( hələ eybəcər qiyafətləri,səhnə mədəniyyətdən uzaq şit hərəkətləri bir yana..) bu böyük məna kəsb edən mahnıya zaman ayırmağa dəyər..

Müəllim,çox gözəl şərh etmisiz,mahnının aurası da çox qəlbə yatandır,ən əsası xoşdur,ruha yatandır,adam özünü sirli aləmfə his edir.. Duyulur ki, Vətən sevgisi ilə hasil olan mahnıdır-halal olsun!

Məcid Məmmədov

Bəli, Rəşad müəllim.Musiqi elə bir sehirdir ki,keçmişi xatırladır,bu günü düşündürür ,gələcəyi isə xəyal etdirir .Yetər ki, musiqi zövqümüz incə və gözəl olsun .

QEYD. Başlıqlar "Facebook" sosial şəbəkəsindəki başlıqla eynilik təşkil edir.