MİLLİ MƏTBUATIMIZIN BÖYÜK HİMAYƏDARI

“Siyasətçilər gələcək siyasəti, jurnalistlər isə gələcək nəsilləri düşünürlər” 

Ümummilli lider Heydər Əliyev

149 il öncə Həsən bəy Zərdabinin naşirliyi ilə işıq üzü görən “Əkinçi” qəzeti Azərbaycanın milli mətbuatının əsasını qoydu. Bu estafet sonradan “Ziya”, “Ziyayi-Qafqaziyyə”, “Kəşkül”, M.Şahtaxtinskinin Tiflisdə nəşr etdirdiyi “Şərqi Rus”, “Həyat”, Ə.Ağaoğlunun yaradıcısı olduğu “İrşad”, “Füyuzat”, H.Z.Tağıyevin təşəbbüsü və maddi köməyilə Bakıda rus dilində dərc edilən “Kaspi”, C.Məmmədquluzadənin redaktorluğu ilə nəşr olunan “Molla Nəsrəddin” kimi mübariz mətbu orqanlarla davam etdirildi... 

Ölkəyə rəhbərlik etdiyi dövrlərdə mətbuatın cəmiyyətə təsir gücünü yüksək dəyərləndirən Ulu Öndər Heydər Əliyev söz azadlığı, kütləvi informasiya vasitələrinin maddi-texniki bazasının möhkəmləndirilməsi yönümündə davamlı tədbirlər həyata keçirib, media sektorunda müsbət mənada nəzərə çarpacaq dəyişiklik olub, Azərbaycan mətbuatı intibah dövrünü yaşayıb.

1969-cu ilin 14 iyulunda Heydər Əliyevin Azərbaycan KP MK-nın birinci katibi seçilməsi ilə ölkədə mətbuatın inkişafı, söz azadlığının bərqərar olması istiqamətində mühüm addımlar atılıb. 1978-ci ildə dövlət dilimiz Azərbaycan dili kimi təsbit olunub. Mətbuatda qadağan olunan milli adət-ənənələrimiz, tariximiz, mədəniyyətimiz və dilimizdən bəhs edən geniş, təhlilli yazılar yer alıb. Bütün bunlar Azərbaycan milli jurnalistika məktəbinin formalaşmasında, müasir jurnalistikanın inkişafında mühüm və müstəsna rol oynayıb. 

1993-cü ilin iyunundan sonra milli mətbuatımızda daha işıqlı səhifələr açılıb. Ulu Öndərin rəhbərliyi və birbaşa iştirakı ilə hazırlanan ölkə Konstitusiyasında vətəndaşların söz azadlığı hüququ təsbit edilib. 1998-ci ildə imzalanan “Azərbaycan Respublikasında söz, fikir və məlumat azadlığının təmin edilməsi sahəsində əlavə tədbirlər haqqında” Fərman, sonradan isə təsdiqlənən “2000-2001-ci illərdə kütləvi informasiya vasitələrinin maddi-texniki şəraitinin yaxşılaşdırılması üzrə tədbirlər Proqamı”, eləcə də bir sıra qəzetlərin “Azərbaycan” nəşriyyatına olan borclarının ləğvi ölkə mətbuatının inkişaf tarixində mühüm hadisəyə çevrilib. 1999-cu ilin sonunda qəbul olunan “Kütləvi informasiya vasitələri haqqında” yeni qanun mətbuatda demokratik prinsiplərin daha da möhkəmləndirilməsinə xidmət edib. 

Heydər Əliyev istər Azərbaycanda, istərsə də ölkə hüdudlarından kənarda dünya media nümayəndələri üçün ən maraqlı siyasətçi-müsahiblərdən idi. O, deyirdi: “Jurnalist əməyi qeyri-adi əməkdir. Böyük səy, zəhmət, cəsurluq, hünər, fədakarlıq, öz peşəsinə vurğunluq tələb edən əməkdir”. Gənclərin, xüsusilə qızların jurnalistikaya gəlməsini arzulayan Heydər Əliyev jurnalistlərə öz peşələrinə sevgi, hörmət və məsuliyyətlə yanaşmağı, eyni zamanda cəsarətli olmağı tövsiyə edirdi. 

Ulu Öndər jurnalistikaya daha yaxın, dördüncü hakimiyyət funksiyasını öz çiyinlərində daşıyan peşə sahiblərinin zəhmətinə qiymət verən insan kimi üç dəfə (2001, 2002 və 2003-cü illərdə) “Jurnalistlərin dostu” adına layiq görülüb. 

Ümummilli Liderimiz hər zaman milli mətbuatımızın bədii-tarixi funksiyasına artıq dəyər verən dövlət xadimi kimi xatırlanır, müasir jurnalistikamızın inkişafında xüsusi yeri olan şəxsiyyət kimi dəyərləndirilir. 

Bu gün yeni inkişaf dövrünü yaşayan Azərbaycan mətbuatı müstəqil fəaliyyətilə ölkəmizin inkişafına töhfəsini verməklə respublikanın informasiya məkanını daha da zənginləşdirir. Ulu Öndərin siyasi kursunu uğurla davam etdirən möhtərəm Prezidentimiz İlham Əliyevin mətbuata diqqət və qayğısı kütləvi informasiya vasitələrinin fəaliyyətinin genişlənməsinə və peşəkarlıq səviyyəsinin yüksəlməsinə səbəb olub. Məhz bunun nəticəsidir ki, Azərbaycanda hər bir şəxs özünə rahat şəkildə mətbuat orqanı yaradır, istər yazılı, istərsə də elektron qəzet və jurnalların  sayı günbəgün artır.

Akif AĞAYEV,

Azərbaycan Jurnalistlər Birliyinin üzvü.