Xalqın qürur və iftixar günləri

 17 və 20 oktyabr tarixləri Azərbaycan xalqının milli yaddaşına qızıl hərflərlə yazılmışdır. Bu günlər xalqımızın qürur mənbəyinə çevrilmiş, işğaldan azad edilən müqəddəs torpaqlarımız – Füzuli və Zəngilan rayonlarının doğma Vətənə qovuşduğu tarixi anlar kimi yadda qalmışdır. 2020-ci ilin Vətən müharibəsi Azərbaycan tarixində dönüş nöqtəsi oldu. 44 gün ərzində Azərbaycan Ordusu Ali Baş Komandan İlham Əliyevin rəhbərliyi ilə möhtəşəm bir hərbi və siyasi qələbəyə imza atdı. Bu zəfər təkcə düşmənin hərbi gücünü darmadağın etməklə deyil, həm də xalqımızın milli ruhunu, birliyini və əzmini bütün dünyaya nümayiş etdirdi.
      17 oktyabrda Füzuli şəhəri, 20 oktyabrda isə Zəngilan rayonu işğaldan azad edildi. Bu torpaqların geri qaytarılması ilə illərlə həsrətdə qalan ocaqlarımıza yeni həyat nəfəsi qayıtdı. Uçulmuş evlər, viran qoyulmuş kəndlər bu gün dövlətimizin dəstəyi ilə yenidən qurulur, müasir infrastruktur layihələri həyata keçirilir, məcburi köçkünlər öz doğma yurdlarına qayıdırlar. Bu proses təkcə fiziki bərpa deyil, həm də mənəvi dirçəlişdir.
       Bu zəfər bizə asan başa gəlmədi. Minlərlə qəhrəman əsgər və zabitimiz Vətən uğrunda canından keçdi, torpaqlarımızı canı bahasına azad etdi. Qazilərimiz şücaətləri ilə tarix yazdılar. Bu gün azad edilən torpaqlarımızda dalğalanan bayrağımız şəhidlərimizin əbədi xatirəsinə ən böyük ehtiramdır. Azərbaycan xalqı qəhrəman şəhidlərimizin ruhu qarşısında baş əyir, onların ailələrinə və qazilərimizə dərin ehtiramını ifadə edir.
       Azərbaycan Prezidenti, Müzəffər Ali Baş Komandan İlham Əliyevin dəfələrlə vurğuladığı kimi, bu qələbə xalq-ordu-dövlət birliyinin təntənəsidir. Bu birlik və əzmkarlıq sayəsində Azərbaycan təkcə torpaqlarını deyil, həm də tarixi ədaləti bərpa etdi. 17 və 20 oktyabr tarixləri bu böyük zəfərin simvoluna çevrilmişdir və gələcək nəsillərə bir qəhrəmanlıq dastanı kimi ötürüləcəkdir.

Nazim ƏLİYEV, 
Masallı Dövlət Regional Kollecinin müəllimi.