Ərkivan “Şəhidlər bulağı” abidə-kompleksi yenidən qurulub - MASALLIDA 

Azərbaycanın müstəqilliyi və ərazi bütövlüyü uğrunda canlarını fəda etmiş qəhrəman şəhidlərimizin xatirəsinin əbədiləşdirilməsi, onların ailələrinə göstərilən qayğı dövlət siyasətimizin əsas istiqamətlərindəndir.
Prezident, Ali Baş Komandan cənab İlham Əliyevin rəhbərliyilə bu sahədə ardıcıl və əhəmiyyətli addımlar atılır. Heydər Əliyev Fondunun prezidenti, Birinci vitse-prezident Mehriban xanım Əliyevanın dəstəyi isə bu istiqamətdə xüsusi rol oynayır.
Eyni zamanda bu ali missiyaya qoşulan vətəndaş cəmiyyəti nümayəndələri, xeyirxah soydaşlarımız da var. 
Uzun illərdir sosial layihələrə dəstək verən iş adamı, şair-publisist və xeyriyyəçi Gülağa Tənhanın maliyyə dəstəyi ilə 22 il əvvəl Ərkivan qəsəbəsində inşa edilən “Şəhidlər bulağı” abidə-kompleksi əsaslı şəkildə yenidən qurularaq müasir tələblərə uyğunlaşdırılıb. Kompleksin girişində qəsəbənin şəhidlərinin adları həkk olunmuş xatirə lövhələri quraşdırılıb. Ərazidə abadlıq işləri görülüb, bulaq ətrafı tamamilə yenilənib və işıqlandırma sistemi quraşdırılıb. Abidə həm tarixi yaddaşı yaşadan bir məkan, həm də gələcək nəsillərə vətənpərvərlik dərsi verən mühüm ziyarətgaha çevrilib.
27 Sentyabr – Anım Günü münasibətilə Masallı Rayon İcra Hakimiyyətinin başçısı Araz Əhmədov, rayon rəsmiləri, iş adamı Gülağa Tənha, şəhid ailələri, qəsəbə sakinləri və ictimaiyyət nümayəndələri abidəni ziyarət ediblər. Ziyarət zamanı abidənin önünə əklillər və gül dəstələri qoyulub, şəhidlərin xatirəsi ehtiramla yad edilib, dualar oxunub.
Tədbirdə çıxış edən rayon rəhbəri Araz Əhmədov, din xadimi Mirkərim Əliyev, xeyriyyəçi Gülağa Tənha, şəhid atası Habil Rəhimov və Vətən müharibəsi iştirakçısı Həmid Mənsimov qeyd ediblər ki, Azərbaycanın əldə etdiyi möhtəşəm Qələbə şəhidlərimizin göstərdiyi misilsiz fədakarlıq sayəsində mümkün olub. Onlar, həmçinin, şəhid ailələrinə göstərilən yüksək dövlət qayğısını xüsusi vurğulayıblar.
Çıxışlarda diqqətə çatdırılıb ki, şəhidlərin xatirəsinin uca tutulması, onların adlarının əbədiləşdirilməsi yalnız dövlətin deyil, hər bir vətəndaşın mənəvi borcudur. Bu baxımdan “Şəhidlər bulağı” abidə-kompleksinin yenidən qurulması və ictimaiyyətin ziyarətinə açılması mühüm hadisə kimi dəyərləndirilib. Bu kompleks təkcə bir memarlıq nümunəsi deyil, həm də Vətənə bağlılığın, şəhidlərə sədaqətin rəmzidir.
Tədbirdən sonra Ərkivan qəsəbəsində yerləşən “Şah Səfi” mərasim evində Anım Gününə həsr olunmuş ehsan süfrəsi açılıb. Ehsanda şəhidlərin ruhuna dualar oxunub, onların ailələrinə bir daha başsağlığı verilib, dəstək və həmrəylik nümayiş etdirilib.

Akif AĞAYEV,
foto: Mahir Əhmədov.