Masallıda Milli Qəhrəmanın xatirəsi anılıb

Azərbaycanın Milli Qəhrəmanı Elşad Hüseynovun anadan olmasının 65 illiyi ilə əlaqədar Masallıda anım tədbiri keçirilib. 
Xıl kəndində təşkil olunan tədbirdə Masallı Rayon İcra Hakimiyyətinin başçısı Araz Əhmədov, Rayon Polis Şöbəsinin rəis müavini İxtiyar Talıbov və digər rayon rəsmiləri, ictimaiyyət nümayəndələri, şəhidin ailə üzvləri, kənd sakinləri və məktəblilər iştirak ediblər.
Əvvəlcə Milli Qəhrəmanı Elşad Hüseynov və Azərbaycanın ərazi bütövlüyü uğrunda şəhid olanların xatirəsi bir dəqiqəlik sükutla yad edilib, qəhrəmanın abidəsi önünə əklil və gül dəstələri düzülüb, şəhidlərimizin ruhuna dualar oxunub. 
Masallı RİH başçısı Araz Əhmədov çıxışında bildirib ki, Elşad Hüseynov Vətən qarşısında öz borcunu ləyaqətlə yerinə yetirərək, xalqımızın yaddaşında əbədi qəhrəman kimi qalıb. Onun keçdiyi şərəfli həyat yolu gənc nəsillərə vətənpərvərlik və fədakarlıq nümunəsi kimi təqdim olunur.
Digər çıxış edənlər Elşad kimi oğullarımızın igidliyi sayəsində 30 il düşmən tapdağındakı torpaqlarımızın Müzəffər Ali Baş Komandanımızın rəhbərliyi və ordumuzun rəşadəti ilə işğaldan azad edildiyini diqqətə çatdırıblar.
Milli Qəhrəmanın övladı Aytən Elşadqızı atasının qəhrəmanlığı ilə fəxr etdiyini və ailəsi adından onlara göstərilən diqqət və qayğıya görə ölkə Prezidenti cənab İlham Əliyevə, Birinci vitse-prezident Mehriban xanım Əliyevaya və rayon rəhbərliyinə minnətdalığını bildirib.
Tədbir məktəblilərin iştirakı ilə təqdim olunan ədəbi-bədii kompozisiya ilə davam edib.
Məlumat üçün bildirək ki, Azərbaycanın Milli Qəhrəmanı, Qarabağ müharibəsi şəhidi Elşad Eynulla oğlu Hüseynov 8 oktyabr 1960-ci ildə Masallı rayonunun Xıl kəndində anadan olmuşdur. 1978-ci ildə burada məktəbi bitirib sovxozda işləmişdir. 1979-1981-ci illərdə Batumidə (Gürcüstan Respublikasında) hərbi xidmətdə olmuşdur. Daha sonra Bakı şəhərində DİN-nin milis nəfəri kimi işə qəbul olunur. Ermənilərin doğma torpaqlarımıza basqınlarını görən Elşad cəbhəyə getmək istəyirdi, bir neçə dəfə müraciətdən sonra o cəbhəyə yola düşür.
Elşad Hüseynov Cuvarlı, Ağbulaq və bir çox başqa kəndlərin azad edilməsində rəşadətlə vuruşmuşdur. Onun şücaəti erməni qəsbkarlarını lərzəyə salmışdı. 15 iyun 1992-ci il döyüşçülərimiz Fərrux kəndini düşməndən azad etməli idilər. 1992-ci il 15 iyunda Ağdam-Fərrux istiqamətində gedən döyüşdə qəhrəmancasına şəhid olmuşdur.
Ailəli idi, üç övladı yadigar qalıb.
Azərbaycan Respublikası Prezidentinin 8 oktyabr 1992-ci il tarixli 264 nömrəli Fərmanı ilə Hüseynov Elşad Eynulla oğlu ölümündən sonra Azərbaycanın Milli Qəhrəmanı adına layiq görülmüşdür.
Masallı rayonunun Xıl kəndində dəfn edilmişdir.

Akif AĞAYEV