Laçının dirçəlişi və qardaşlıq əməkdaşlığı

  Prezident İlham Əliyev çıxışında Azərbaycan ilə Tacikistan arasında formalaşmış dostluq, qardaşlıq və qarşılıqlı dəstəyə əsaslanan münasibətlərin ardıcıl şəkildə inkişaf etdiyini vurğulamışdır. O, bu əlaqələrin böyük potensiala malik olduğunu qeyd edərək, qarşıdakı illərdə əməkdaşlığın daha da dərinləşəcəyinə əminliyini ifadə etmişdir.
      Dövlət başçısı çıxışı zamanı humanitar sahədə əməkdaşlığın möhkəmləndirilməsinin də önəmini xüsusi qeyd etmişdir. O, Laçın şəhərinin bu il MDB-nin mədəniyyət paytaxtı kimi seçilməsinə də toxunaraq, bu qərara görə MDB dövlət başçılarına təşəkkürünü bildirmişdir. Prezidentin sözlərinə görə, bu mühüm hadisə Azərbaycanın qədim və strateji bölgəsi olan Şərqi Zəngəzurun, o cümlədən Laçının tarixi və mədəni irsinin tanıdılması baxımından böyük əhəmiyyət daşıyır.
Cari ilin iyun ayında Laçında “MDB-nin mədəniyyət paytaxtı İli”nin açılış mərasimi keçirilmiş, tədbir çərçivəsində iştirakçılara şəhərin tarixi, zəngin mədəniyyəti və dirçəliş prosesi haqqında ətraflı məlumat verilmişdir. 
       Prezident İlham Əliyev çıxışında bildirib ki, Ermənistanın 30 illik işğalı zamanı tamamilə dağıdılmış Laçın şəhəri qısa müddət ərzində bərpa olunaraq müasir, gözəl və yaşamaq üçün əlverişli bir şəhərə çevrilmişdir. Bu sürətli inkişaf beynəlxalq qonaqlar tərəfindən də yüksək qiymətləndirilmişdir.
      Beləliklə, ölkə rəhbərimizin çıxışı Azərbaycan-Tacikistan münasibətlərinin güclənməsi və Laçının sürətli dirçəlişinin beynəlxalq aləmdə tanıdılması baxımından mühüm əhəmiyyət daşıyır.

Həbib Həbibov, 
Masallı şəhəri