İngiltərə 1/8-də Slovakiyanı məyus edib

Almaniyada futbol üzrə keçirilən UEFA Avropa çempionatı davam edir. Dünən çempionatda 1/8 final mərhələnin daha iki oyunu keçirilib. İlk olaraq münasibətləri ayırd etmək üçün İngiltərə ilə Slovakiya yığması qarşılaşıb. Helzenkirxen şəhərindəki "Veltins Arena"da baş tutan dramatik oyun Britaniyalıların minimal hesablı qələbəsi ilə bitib - 2:1.

Maraqlıdır ki, bu oyunda ilk qol sevincini yaşayan Slovakiya yığması olub. Matçın 25-ci dəqiqəsində Şrants hesabı açaraq Slovakiya yığmasın irəli çıxarıb - 0:1. Matçın sonuna qədər İngiltərə komandası hesabda geri olub. Yalnız hakimin əlavə etdiyi dəqiqədə (90+5) ingilislər bərabərlik qolunu vurublar. İngiltərəni bu məqlubiyyətdən xilas edən Madrid "Real"inda forma geyinən Cud Bellinqem olub. O, akrobatik sıçrayışla baxımlı bir qolla imza atıb - 1:1.

Matçın əsas vaxtı bu hesabla bitib. Qalibi aşkar etmək üçün komandalar əlavə 30 dəqiqə oynamalı olublar. Əlavə vaxtın elə ilk dəqiqəsindəcə İngiltərə millisinin lideri (kapitanı) 30 yaşlı Harri Keyn Slovakiya yığmasınin qapısına qol vuraraq komandasını hesabda irəli çıxarıb - 2:1. Bundan sonra oyunda başqa qol vurulmayıb. Bununla da Bellinqemin məqlubiyyətdən xilas etdiyi, ardından Keynin qələbə qazandırdığı İngiltərə millisi Avro-2024-un 1/4 finalına yüksəlib.

İNTİQAM Məmmədov