Güləşçilərin Bakı-2024 lisenziya turnirinin yarış cədvəli 

Aprelin 5-dən 7-dək Bakıda güləş üzrə Avropa Olimpiya Təsnifatli beynəlxalq turnir keçiriləcək. Üç gün davam edəcək turnirdə ev sahibi Azərbaycan da daxil olmaqla, 33 ölkəni təmsil edən 297 (117 Yunan-Roma, 83 qadın, 97 sərbəst güləş) idmançının mübarizə aparacağı turnirin gündəlik yarış proqramı da tərtib edilib.

Turnirin ilk günü Yunan-Roma güləşi üzrə görüşlər keçiriləcək. Saat 10-dan 15-dək təsnifat (seçim) görüşləri olacaq. Saat 18-dən 20-dək isə yarımfinal qarşılaşmaları baş tutacaq. Reqlamentə görə, finala yüksələn hər iki guləsci Paris-2024-ə lisenziya qazanacaq. Yeri gəlmişkən, bu turnirdə final görüşləri keçirilməyəcək. 

Aprelin 6-da meydan qadın güləşçilərin ixtiyarına veriləcək. Saat 10-dan 13:30-dək təsnifat görüşləri, saat 18-dən 20-dək isə yarımfinal qarşılaşmaları olacaq. Burada da finala yüksələn hər iki guləsci final görüşü keçirmədən birbaşa Olimpiada-2024-ə lisenziya əldə edəcək.

Aprelin 7-nə təsadüf edən son gündə isə sərbəst güləşçilər mübarizə aparacaqlar. Saat 10:30-dan 14:00-dək təsnifat, saat 18:00-dan 20:00-dək isə yarımfinal qarşılaşmaları keçiriləcək və bununla da bütün finalçılar və lisenziya qazan güləşçilər müəyyənləşəcək.

Xatırladaq ki, Azərbaycan güləşçiləri indiyədək 3 lisenziya qazanıblar.

İNTİQAM Məmmədov