Şəhriyar Məmmədyarov reytinqdə irəliləyib, Teymur Rəcəbovsa...

Beynəlxalq Şahmat Federasiyası (FİDE) kişi və qadın şahmatçıların reytinq cədvəlinin aprel ayinin 1-ə olan vəziyyətini elan edib. 

Qeyd edək ki, Azərbaycanın  kişi şahmatçıları arasında  (Top-100-də yer alanlar) ən yaxşı göstərici Şəhriyar Məmmədyarova (2733) məxsusdur. O, əvvəlki cədvəllə müqayisədə bir qədər irəliləməklə Top-20-də 17-ci olub. 

Ölkənin digər lider şahmatçısı Teymur Rəcəbovsa (2723) bir qədər geriləməklə 28-ci pilləyə düşüb. Aktivində 2651 xalı olan Rauf Məmədov 85-ci yerdə qərarlaşıb. Azərbaycanı Dünay Şahmat Tacı uğrunda keçiriləcək iddiaçılar turnirində təmsil etmək hüququ qazanan Nicat Məmmədovsa Top-100-dən kənarda qalıb. 

Xatırladaq ki, kişilərin reytinq cədvəlinə yenə də hamı üçün əlçatmaz olan norveçli sabiq dünya çempionu Maqnus Karlsen (2830) liderlik edir. Cədvəldə 2-3-cü yerləri isə müvafiq olaraq ABŞ təmsilçiləri Fabiano Karuana (2802) və Xikaru Nakamura (2789) tutur.

Qadın şahmatçılarımıza gəlincə, burada 5 təmsilçimiz Top-100-də yer alıb ki, onların da arasında ən yaxşı göstərici yığmanın lideri hesab edilən Günay Məmmədzadəyə məxsusdur. O, 2436 xalla 34-cü pillədə yer alıb. Gövhər Beydullayeva (2402) cədvəldə 46-cı, Ülviyyə Fətəliyeva (2377) 72-ci. Xanım Balacayeva (2371) 77-ci, Gülnar Məmmədovasa (2352) 99-cu yeri tutur. 

Qadınların reytinq cədvəlinə əvvəlki kimi Çindən olan dünya çempionu Xou İfan (2632) liderlik edir. İkinci yeri 2559 xalla onun həmvətəni Tszyuy Ventszyunun tutduğu cədvəldə ilk üçlüyü rusiyalı Aleksandra Qoryaçinka (2553) tamamlayır. 

Yığmaların reytinq cədvəlinə isə 2724 xalla ABŞ liderlik edir. Hindistanın (2713) ikinci, Çinin (2685) üçüncü, Rusiyanın (2683) dördüncü olduğu cədvəldə Azərbaycan (2648) beşinci yeri tutmaqla Top-5-i tamamlayıb. Yığmamız Top-10-da isə Fransa, Ukrayna,  Almaniya, Ermənsitan və İspaniyanı qabaqlayıb. 

İNTİQAM Məmmədov