Elcan Hacıyevlə Uşanqi Kokuari Tbilisi Dəbilqəsinin finalına yüksəlib 

Martın 22-də Gürcüstanın paytaxtı Tbilisidə kişi və qadın çüdoçular arasında startı verilən və Azərbaycan təmsilçilərinin də (11 kişi, 4 qadın) qatıldığı reytinq xarakterli Böyük Dəbilqə turniri davam edir. Turnirin bu günə təsaduf edən 3-cü günü daha 4 cüdoçumuz tatami üzərinə çıxaraq mübarizəyə qatılıb. Bu təmsilçilərimizdən ikisi - Elcan Hacıyev (90 kq) və Uşanqi Kokuari (+100 kq) daha yaxşı güləşərək finala yüksəlib. Bu isə o anlama gəlir ki, hər iki cüdoçumuz ən pis halda turnirin gümüş medalını və 700 reytinq xalını özünə təmin edib. 

Qeyd edək ki, finala gedən yolda Böyük Britaniya, Kuba, Slovakiya və Koreya təmsilçisini məğlub edən Hacıyev həlledici görüşdə gürcüstanlı Laşa Bekauri ilə qarşılaşacaq. 

Müvafiq ardıcıllıqla Monako, Özbəkistan, Gürcüstan və Kuba təmsilçisini məğlub edədərk finala yüksələn digər təmsilçimiz - Uşanqi Kokuari isə çempionluq uğrunda Quram Tuşişvili (Gürcüstan) ilə güləşəcək. 

Bu gün tatamiyə çıxan digər cüdoçularımıza gəlincə, Vüqar Talıbov (90 kq) ikinci, Camal Qamzatxanov (+100 kq) isə elə start görüşündə məğlubiyyətlə üzləşərək mübarizəni erkən dayandırıb. 

Xatırladaq ki, turnirin ilk günü Balabəy Ağayevlə (60 kq) Ruslan Paşayev (66 kq) çıxışını 3-cü yerdə başa vuraraq, bürünc medal qazanıb.

Qeyd: Reqlamentə görə hər çəkidə ilk 3 yeri tutan cüdoçu aktivinə müvafiq olaraq, 1000, 700 və 500 reytinq xalı yazdırmış olacaq. 

İNTİQAM Məmmədov