Azərbaycan qadın voleybolçuların Avropa çempionatına yenə ev sahibliyi edəcək

Azərbaycan qadın voleybolçular arasında keçiriləcək Avropa çempionatına (CEV EuroVolley Women) ev sahibliyi edəcək. AVF-dan verilən məlumata görə, ölkəmiz Gürcüstanla birgə keçirdiyi AVRO-2017-dən doqquz il sonra yenidən bu hüquqa yiyələnib.

Azərbaycan bu dəfə dörd qrupdan birinə ev sahibliyi edəcək. Qarşılaşmalar 2017-ci ildə olduğu kimi yenə Milli Gimnastika Arenasında təşkil olunacaq. Xatırladaq ki, Serbiya millisinin çempion olduğu həmin yarışda Azərbaycan Avropanın ən güclü dörd komandasından biri olub.

Qeyd edək ki, 2026-cı il yayın sonuna planlaşdırılan bu çempionatda ümumilikdə Avropanın 24 ən yaxşı komandası mübarizə aparacaq. Bu komandalardan altısı məhz Bakıda qarşılaşacaqlar. Avro-2026-ya Azərbaycanla yanaşı, Çexiya və İsveçin birgə ev sahibliyi edəcəyi artıq təsdiqlənib.

CEV prezidenti Aleksandar Boriçiç qitə birinciliyinin yenidən Azərbaycanda keçirilməsi ilə bağlı fikirlərini bölüşüb: “Biz əminik ki, Avropa çempionatı Azərbaycan yığmasının hazırkı üzvləri, eləcə də gənclər üçün böyük stimul olacaq, gələcək nəsil azərbaycanlı oyunçuları ruhlandıracaq. Biz onlarla işləməyi səbirsizliklə gözləyirik. Əminik ki, Azərbaycan Voleybol Federasiyası yarışın yenə yüksək səviyyədə təşkili üçün əlindən gələni edəcək”.

İNTİQAM Məmmədov