Boksçumuz Nicat Hüseynov Olimpiada-2024-ə lisenziya qazanıb

İtaliyanın Busto Arsizio şəhərində kişi və qadın boksçular arasında keçirilən və Azərbaycan təmsilçilərinin də iştirak etdiyi Dünya Olimpiya Təsnifatli turnir davam edir. Dünən turnirdə 1/4 final mərhələnin döyüşləri keçirib və bununla da həm yarımfinalçılar, həm də bir neçə çəki dərəcələrində Olimpiada-2024-ə lisenziya qazanmış boksçular müəyyənləşib.

Bu mərhələdə Azərbaycan yığmasının iki üzvü - ikiqat Avropa çempionu adını daşıyan Nicat Hüseynov (51 kq) və Sərxan Əliyev (71 kq) rinqə çıxıb. Turnirin reqlamentinə görə, boksçularımız bu mərhələni də qələbə ilə başa vuracağı halda yarımfinala yüksəlməklə yanaşı, həm də Paris-2024 Yay Olimpiya Oyunlarına lisenziya qazanacaqdı. 

Təəssüflər olsun ki, bu uqura cütlüyümüzdən yalnız Hüseynov imza ata bilib. O, bu mərhələdə ABŞ təmsilçisi Rosko Hill (dünya ikincisi) üzərində qələbə qazanıb - 3:2. Xatırladaq ki, ikiqat Avropa çempionumuz bura qədər müvafiq ardıcıllıqla dünya üçüncüsü olan hindistanlı Deepak Deepaki, dünya çempionatının finalçısı və qitə çempionu Sahil Alahverdovini (Gürcüstan) və Avropa çempionatının ikincisi olmuş erməni boksçu, U-22-lərin qitə birinciliyində məqlub etdiyi Rudolf Qarboyanı rinqə çıxmağa peşman edib.

 Hüseynovdan fərqli olaraq, Əliyev yarımfinala gedən yolda qazaxıstanlı Aslanbek Şimberqenovla bacarmayıb (2:3) və bununla da həm medalın, həm də lisenziyanın bir addımlığında mübarizəni dayandırıb. Beləliklə də turnirə qatılan 9 təmsilcimizdən 8-i mübarizəni erkən dayandirmaqla qarşıya qoyulan hədəfə çata bilməyib.

Yeri gəlmişkən, Nicatdan öncə isə daha iki boksçumuz - Murad Allahverdiyev (80 kq) və Məhəmməd Abdullayev (+92 kq) Krakovda (Polşa) keçirilən ikinci Avropa Oyunlarında lisenziya qazanıb.

İNTİQAM Məmmədov