DÇ-2026 FİNAL: İspaniya ikiqat dünya çempionudur

İyunun 11-də ABŞ, Kanada və Meksikada planetin 48 ən yaxşı komandasının iştirakı ilə startı verilən futbol üzrə 23-cü dünya çempionatına iyulun 19-da baş tutan həlledici final matçı ilə yekun vurulub. Nyu-York (ABŞ) şəhərindəki "New/York New Jersey Stadium" arenada baş tutan və 87.157 tamaşaçının gözü qabağında keçirilən həmin oyunda son çempion olmaqla, üçqat dünya çempionu adını daşıyan Argentina millisi ilə Avropanın ən güclüsü, DÇ-2010 və AÇ-2024-ün qalibi olan İspaniya yığması qarşılaşıb. Qarşılaşma, bütün parametrlərdə üstünlük təşkil edən İspaniya millisinin minimal hesablı qələbəsi ilə başa çatıb - 1:0. Qeyd edək ki, əsas vaxtında qalibi aşkar edilməyən matçın taleyini həll edən yeganə qolun müəllifi isə 62-ci dəqiqədə əvəzləmə ilə meydana girən Ferran Torres olub. O, 106-cı dəqiqədə Niko Uilyamsın ötürməsini qola çevirməklə İspaniya millisinə öz tarixində ikinci dəfə çempionluq sevincini yaşadıb. 

Qeyd edək ki, bütün oyun ərzində gözəl seyvləri ilə diqqət çəkən və dəfələrlə Argentina millusini real qoldan xilas edən təcrübəli qolkiper Martines bu anda komandasını xilas edə bilməyib.

 Maraqlıdır ki, İspaniya millisi DÇ-2010-un finalında da Hollandiya ilə qarşılaşmanın əlavə vaxtında qələbə topunu vurmuşdu.

Bununla da İspaniya eyni göstərici ilə Fransa və Uruqvay komandasına çatıb (hərəsi 2 dəfə dünya çempionu olub). İspanlar indi çempionluq tituluna görə Braziliya (5 qat dünya çempionu), Almaniya (4), İtaliya (4) və Argentinadan (3) geri qalır. Yeri gəlmişkən, Argentina öz tarixində 4-cü dəfə mundialın finalında büdrəyib. 

Oyunun gedişinə gəlincə, demək olar ki, bütün 90 dəqiqə, eləcə də əlavə vaxtlar ispanların tam və açıq-aşkar üstünlüyü ilə keçib. Hələ bu azmış kimi, Argentina millisinin oyunçusu, kobudluğa görə 82-ci dəqiqədə sloveniyalı hakim Slavko Vinçiçdən  sarı kart alan Entso Fernandes 90+3 dəqiqədə isə qırmızı kartla meydandan qovularaq, komanda yoldaşlarını azlıqda qoyub. Bu da öz təsirini göstərib. 

Beləliklə, hamının Lamin Yamal - Lionel Messi qarşılaşması kimi səciyyələndirdiyi bu möhtəşəm matç birincinin qələbəsi ilə bitib. 19 yaşlı Lamin dunya çempionu olub. Dünya futbolunun canlı əfsanələrindən biri olan Messinin isə çempionluq arzusu reallaşmayıb. O, matçın sonunda göz yaşlarına hakim ola bilməyib. Özünün əsas rəqibi olan portiqaliyalı Kriştiano Ronaldo kimi. Amma, bütün bunlara baxmayaraq, DÇ-2026-da 8 oyunda 8 qol vuran və 4 məhsuldar ötürmə ilə yadda qalan Messinin yenə də dünyanın ən yaxşı oyunçusu seçilmək və "France Football"in təsis etdiyi "Qızıl top" mükafatına layiq görülmək şansı var. Baxmayaraq ki, fransalı Kilian Mbappe onu bu göstəricilərdə qabaqlayır (10 qol və 4 assistentlik).

Beləliklə, futbol dünyasının daha bir 4 illik zirvə yarışı geridə qalıb. 

İNTİQAM Məmmədov