Ali Tsokayev bu üçüncü qızılını qazanıb

İki gün öncə Macarıstanın paytaxtı Budapeştdə idman güləşi üzrə (sərbəst, qadın və yunan-Roma) mövsümün sayca 4-cü olan reytinq xarakterli beynəlxalq turnirinə start verilib. Azərbaycanın 20 (10 sərbəst güləş, 5 qadın və 4 yunan-Roma) idmançı ilə qatıldığı bu yarışın ilk üc günü sərbəst güləşçilər döşək üzərinə çıxıblar. Güləşçilərimizdən ikisi daha inamla güləşərək mükafatçılar sırasında yer alıb. Qazanılan medallardan biri qızıl, digəri gümüş əyarlı olub. Qızıl medal Ali Tsokayevin (92 kq) aktivinə yazılıb. Qeyd edək ki, ardıcıllıqla ABŞ, Bəhreyn və Türkiyə təmsilçisini məğlub edən güləşçimiz finala yüksəlib. Onun finaldakı rəqibi Muhammed Alıyev (Ukrayna) zədə üzündən döşək üzərinə çıxmadığına görə, Tsokayev qızıl medal qazanıb. Bu onun karyerasında reytinq turnirində ilk qızılıdır. Hazırkı mövsümdə isə üçüncü qızılı olub. Xatırladaq ki, Tsokayev bu il həm U-23-lərin, həm də böyüklərin Avropa çempionatında qızıl medal qazanıb.

Qazanılan gümüşün sahibi isə Cəbrayıl Həsənov (79 kq) olub. 

Qazaxıstan və Gürcüstan təmsilçisini udaraq finala yüksələn Həsənov həlledici finalda monqolıstanlı Suldxuu Olonbayarla bacarmayıb - 0:5.

Xatırladaq ki, 15-17 İyulda sərbəst güləşçilər, 16-18 iyulda qadınlar, 17-19 iyulda isə yunan-Romacilar mübarizə aparırlar.

İNTİQAM Məmmədov