DÇ-2026-da Atlanta möcüzəsi 

Messi penaltini bura bilməsə də, Argentinanı batmağa qoymayıb

Futbol üzrə keçirilən və sayca 23-cü olan  dünya çempionatı 1/8 mərhələnin oyunları ilə davam edir. İyulun 7-də mundialın bu mərhələsində daha bir dramatik oyun keçirilib. Söhbət Atlantadakı (ABŞ) "Mersedes-Benz Stadium" Arenada baş tutan və sonu 3:2 hesabla bitən Argentina - Misir matçından gedir. Taleyi fransalı referi Fransua Leteksyə həvalə edilən matçın əvvəli misirlilərin üstünlüyü ilə kevsə də, sonluq daha dramatik kecib və cənubi amerikalılar hesabda geri dönüş edərək qələbə qazanıblar ki, bu da onların mundialın 1/4 finalına çıxmasını təmin edib. Çoxlarının Messi - Salax qarşıdurması kimi dəyərləndirdiyi bu oyunun gedişinə gəlincə, hesabı 15-ci dəqiqədə misirli Yasser İbrahim açıb - 0-1. Bundan 6 dəqiqə (21-ci dəq) sonra Misirin qapısına penalti təyin edilib. Lakin argentinalı canlı əfsanə - Lionel Messi bu zərbədən yararlana bilməyib və bir çempionatda 2 penaltini vura bilməyən futbolçu kimi anti rekorda imza atıb.

Matçın 67-ci dəqiqəsində isə Misir futbolçusu Mostafa Ziko səhnəyə çıxıb və hesabı 2:0-a çatdırıb. Bundan sonra artıq hər kəs hazırkı dünya çempionu adını daşıyan Argentinanın mundialla bidalaşacağını düşündüyü bir vaxtda Atlantada möcüzə baş verib. Matçın 79-cu dəqiqəsində argentinalılar buraxdıqları qollardan birinin əvəzini çıxa biliblər. Penaltini vura bilməyən Messinin ötürülməsini komanda yoldaşı Kristian Romera qola çevirməklə hesab arasındakı fərqi azaldıb - 1:2. Hücum həmləsini davam etdirən Argentina millisi 83-cü dəqiqədə bərabərlik yarada bilib -2:2. Qolun müəllifi Messi özü olub. O, bununla da DÇ-2026-da 8-ci, mundiallar tarixində isə 21-ci qolunu vurmaqla özünə məxsus olan rekordu təzələyib. Matçın taleyi isə 90+2 dəqiqədə həll edilib. Entso Fernandesin oyunda vurduğu son qol Argentinanı 1/4-ə yüksəldib, Misiri isə evə yola salıb.

Beləliklə, 1/4-ə yüksələn Argentina bu mərhələdə İsveçrə - Kolumbiya matçının qalibi ilə üzləşəcək.

İNTİQAM Məmmədov