Güləşçilərimiz ilin ilk reytinq xarakterli turnirinə qatılacaqlar 

Yanvarın 10-dan 14-dək Xorvatiyanın paytaxtı Zaqrebdə güləş üzrə ilin ilk reytinq xarakterli turniri keçiriləcək. Beş gün davam edəcək turnirdə hər üç növdə olmaqla Azərbaycan 26 idmançı ilə iştirak edəcək. 

Azərbaycan Güləş Federasiyasından aldığımız məlumata görə, turnirin ilk iki gündə sərbəst güləşçilər mübarizə aparacaqlar. Məşqçilər Taymuraz Kokoyev və Şərif Şərifovun rəhbərliyi altında sərbəst güləşçilərimizdən İslam Bazarqanov (57 kq), Əliabbas Rzazadə, Nurəddin Novruzov (hər ikisi 61 kq), Zirəddin Bayramov (65 kq), Cəbrayıl Qadjiyev (74 kq), Osman Nurmaqomedov, Arseniy Djioyev (hər ikisi 86 kq), Georgi Meşvildişvili və Vaxit Qalayev (hər ikisi 125 kq) döşək üzərinə cıxaraq, medallar uğrunda mübarizə aparacaq. 

Turnirin 3-cü günü qadın güləşçilər xalça üzərinə çıxaraq mübarizəyə qatılacaqlar. Bu yarışda isə ölkəmizi baş məşqçi Semyon Şterev və məşqçi Ağahüseyn Mustafayevin rəhbərliyi altında Gültəkin Şirinova (55 kq), Jalə Əliyeva (57 kq), Alyona Kolesnik (59 kq), Birgül Soltanova (62 kq) və Elis Manolova (68 kq) təmsil edəcək.

Yarışın son iki günündə isə klassiklər (yunan-Roma güləşi) mübarizə aparacaqlar. Klassiklər arasında ölkəmizi idman şərəfini baş məşqçi Aleksandr Tarakanov, böyük məşqçi Rövşən Bayramov, məşqçilər Həsən Əliyevlə Kamran Məmmədovun rəhbərliyi altında Nihat Məmmədli (60 kq), Murad Məmmədov (63 kq), Həsrət Cəfərov (67 kq), Ülvü Qənizadə (72 kq), Sənan Süleymanov, Xasay Həsənli (hər ikisi 77 kq), İslam Abbasov, Rafiq Hüseynov (hər ikisi 87 kq), Murad Əhmədiyev, Murat Lokyayev (hər ikisi 97 kq), Beka Kandelaki və Sabah Şəriəti (hər ikisi 130 kq) qoruyacaq. 

Yeri gəlmişklən, qadın yığmasının liderlərində sayılan Elnurə Məmmədova (53 kq) və klassiklərdən Eldəniz Əzizli (55 kq) Zaqreb turnirinə qatılmayacaq. 

İNTİQAM Məmmədov