Xətai Sənət Mərkəzində "Fərqli Dünyam və Akvarel" adlı sərgi keçirilib

Xətai Sənət Mərkəzində 6 iyun tarixində "Fərqli Dünyam və Akvarel" adlı möhtəşəm sərgi keçirilib. Autizm problemi haqqında məlumatın yayılmasına həsr olunmuş bu xüsusi layihədə autizm spektr pozğunluğu olan uşaqların və gənclərin heyrətamiz akvarel əsərləri təqdim edilib. Bu əsərlər sadəcə rəsmlər deyil, dünyaya dərin baxış, səmimi özünüifadə və anlaşmaya doğru bir körpü olub. Sərginin əsas məqsədi incəsənətin şəfaverici gücü vasitəsilə autizmli uşaqların inklüziyası və sosiallaşmasının dəstəklənməsi olub.
Sərginin açılış mərasiminin aparıcılığını Lalə xanım Məhərrəmova etdi. O, tədbiri yüksək peşəkarlıqla idarə edərək, həm qonaqları salamladı, həm də çıxışçılara söz verdi. Musiqi çıxışları ilə başlayan tədbir, qonaqların unudulmaz anlar yaşamasına səbəb oldu:
 • "Engelsiz Music" qrupunun təsisçisi Lalə Cəfərova rəhbərliyində, ana və autizm spektrli uşaqların rəqsi böyük rəğbətlə qarşılanıb. Həmçinin qrupun üzvü Elias Ələkbərovun pianoda ifası dinləyicilərə xoş anlar yaşadıb.
 • Sərgi iştirakçısının valideyni, istedadlı musiqiçi Nailə Koçərlinskayanın skripkada ifası tədbirə xüsusi rəng qatıb.
 • Musiqi proqramının sonunda "Tanıyın Tanıdın Bizi 1" layihəsinin qalibi, günəş sevgisi ilə dolu ürəkli qonağımız Məryəm Şixalızadə gözəl Azərbaycan rəqsi ilə qonaqları heyran etdi.

Tədbir boyu, həm təşkilatçılar, həm də dəstək verən qurumların nümayəndələri "Fərqli Dünyam və Akvarel" sərgisinin təkcə bir sənət sərgisi olmadığını, əksinə, dərin bir sosial məna daşıdığını vurğuladılar. Onlar bu sərginin autizm haqqında məlumatlılığı artırmaq və autizm spektr pozğunluğu olan uşaqların bənzərsiz istedadlarını və daxili dünyalarını nümayiş etdirmək üçün mühüm bir platforma olduğunu qeyd etdilər. Çıxışlarda incəsənətin müalicəvi və inteqrasiyaedici qüvvəsi xüsusi vurğulanmış, akvarel rəsmlərinin bu uşaqlar üçün necə bir özünüifadə və sosiallaşma vasitəsinə çevrildiyi diqqətə çatdırılmışdır. Bu sərgi, müxtəlifliyin gözəlliyini qeyd edən və hər kəsin qəbul edildiyi daha inklüziv bir cəmiyyətə doğru atılan əhəmiyyətli bir addım kimi dəyərləndirilmişdir.
Sərginin əhəmiyyətini vurğulamaq və layihə haqqında məlumat vermək üçün aşağıdakı şəxslərə söz verildi:
Təşkilatçılar adından:
 • Səbinə İskəndər – IWS Azerbaijan - Beynəlxalq Akvarel Cəmiyyətinin Azərbaycan nümayəndəliyinin rəhbəri
 • Zahid Əvəzov – Xətai Sənət Mərkəzinin direktoru
 • Elminaz Qəhrəmanova – IWS Art for Healing təşkilatının rəhbəri və IWS Azerbaijan art meneceri
 • Fidan Alimova – IWS Azerbaijan Kids Art nümayəndəsi
 • Pərviz Əliyev – IWS Azerbaijan sədr müavini
 • Rahim İbrahimov – Rəssamlıq Sənətinin İnkişafına Dəstək İctimai Birliyinin rəhbəri
 • Gündüz Həbibov – Xətai Sənət Mərkəzi nəzdindəki IWS Khatai Kids Art təşkilatının nümayəndəsi
Dəstəkçilər adından:
 • Alı Mustafayev – Ailə və Uşaqların Sosial Problemlərinin Həllinə Dəstək İctimai Birliyinin rəhbəri
 • Ayşən Nağıyeva – "İnklüziv İnkişaf" Gənclər Təşkilatının nümayəndəsi
Tədbirin sonunda autizm spektr pozğunluğu olan uşaqlara sertifikatlar və kataloqlar təqdim edilib. Həmçinin, bu xüsusi layihəyə dəstək verən bütün dəstəkçilərə təşəkkürnamələr təqdim olunub. Sərgi iştirakçılar və qonaqlar üçün unudulmaz bir  təcrübə oldu.
İnformasiya dəstəyinə görə təşəkkür edirik:

Azpress.az İnformasiya Agentliyinin fotomüxbiri Mahir Əhmədov
ATV Azad Azərbaycan televiziyası nümayəndələri
"Бакинский рабочий" qəzetinin müxbiri Bəsti Paşa