”SƏN ELƏ BİR ZİRVƏSƏN” – Lənkəran-Astara Regional Mədəniyyət İdarəsinin hesabat yığıncağı və konserti

Dekabrın 26-da Lənkəran-Astara Regional Mədəniyyət İdarəsinin rəisi Bəxtiyar Qılıncovun sədrliyilə 2023-cü ilin yekunlarına həsr olunmuş hesabat yığıncağı və Ümummilli Lider Heydər Əliyevin 100 illiyinə həsr edilmiş “Sən elə bir zirvəsən” adlı hesabat konserti keçirilib. Əvvəlcə hesabat yığıncağına toplaşanlar Lənkəran rəssamlıq məktəbinin şagirdlərinin əl işlərindən ibarət sərgi ilə tanış olublar. Sərgidə Ulu Öndər Heydər Əliyevə və vətənpərvərlik mövzularına həsr olunan rəsm əsərləri nümayiş edilib. İdarə əməkdaşlarının və Lənkəran, Astara, Lerik, Masallı, Cəlilabad, Yardımlı rayonlarında fəaliyyət göstərən müəssisə rəhbərlərinin iştirak etdiyi iclasda il ərzində görülmüş işlər müzakirə edilib, 2024-cü il üzrə əsas prioritetlər müəyyən olunub. Hesabat yığıncağı Ulu Öndər Heydər Əliyevin və şəhidlərin əziz xatirəsinin ehtiramla yad olunası ilə başlayıb. Yığıncaqda hesabat məruzəsi ilə çıxış edən idarənin rəisi Bəxtiyar Qılıncov mədəniyyət müəssisələrinin fəaliyyətlərinin müxtəlif aspektlərinə toxunaraq, əldə olunmuş uğurlardan, yol verilmiş nöqsanlardan, növbəti ildə qarşıda duran vəzifələrdən danışıb. Sonra Lənkəran şəhər Heydər Əliyev Mərkəzinin direktoru Reyhanə Sadıxova, Lerik rayon Mədəniyyət Mərkəzinin direktoru Şəfahət Əliyev, Masallı rayon Mərkəzi Kitabxanasının direktor əvəzi Zamin Məmmədov, Yardımlı rayon Uşaq İncəsənət Məktəbinin direktoru Zeyni Əkbərov, Astara Dövlət Rəsm Qalereyasının direktoru Naibə Mustafayeva il ərzində görülən işlərdən bəhs edərək, qarşıya qoyulan vəzifələrin uğurla yerinə yetirilməsinə səylə çalışacaqlarını bildiriblər. Tədbir Lənkəran-Astara Regional Mədəniyyət İdarəsinin təşkilatçılığı ilə Q.Vəliyev adına Lənkəran şəhər Mədəniyyət Mərkəzində Ümummilli Lider Heydər Əliyevin 100 illiyinə həsr edilmiş “Sən elə bir zirvəsən” adlı hesabat konserti ilə davam edib. Əvvəlcə Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib. Sonra müasir Azərbaycanın qurucusu və memarı Ulu Öndər Heydər Əliyevin həyat və fəaliyyətindən bəhs edən sənədli film nümayiş olunub. Konsertdə idarənin tabe müəssisələrində fəaliyyət göstərən özfəaliyyət kollektivləri, mədəniyyət mərkəzlərinin solistləri, uşaq incəsənət məktəblərində müxtəlif ixtisaslar üzrə təhsil alan şagirdləri maraqlı ifalar təqdim ediblər. Yekunda “Heydər Əliyev İli” çərçivəsində keçirilən tədbirlərdə fəal iştirakına görə mədəniyyət kollektivləri və işçiləri, həmçinin yaradıcı şəxslər Lənkəran-Astara Regional Mədəniyyət İdarəsinin Fəxri fərman və “Təşəkkürnamə”ləri ilə təltif ediliblər.

Akif AĞAYEV