Bəybala Mirzəyev:

 Nikolun coğrafiya "müəllim"ləri...

Ermənistanın baş naziri Nikol Paşinyanın bu gün Facebook hesabında Qərbi Azərbaycanla bağlı etdiyi paylaşımına baxdım və bir daha əmin oldum ki, bu adamın nə siyasi coğrafiyadan, nə də tarixi coğrafiyadan düz-əməlli anlayışı var.

Əslində, Nikol Vovayeviçin coğrafiyanın "ana"sını ağlatmağına əsla təəccüblənməməliyik. Çünki eşitdiyimə görə onun orta məktəbdə "Coğrafiya" fənnindən qiymətləri heç də yaxşı olmayıb.

Və ən maraqlısı da budur ki, bu gün Ermənistanın baş naziri Cənubi Qafqazın siyasi və tarixi coğrafiyasını Fransanın və İranın İrəvandakı fövqəladə və səlahiyyətli səfirləri Olivie Decottini və Mehdi Sobhanidən öyrənir.

Bəli, məhz bu iki türkəfob diplomat Ermənistan rəhbərliyinə Qərbi Azərbaycanın İranda olduğunu təlqin edirlər (Dekottininin Qərbi Azərbaycanla bağlı məlum paylaşımını yəqin ki, yaxşı xatırlayırsınız).

Paşinyan isə özünü axmaq, avam (əslində isə bic erməni) yerinə qoyaraq, guya Qərbi Azərbaycanın yalnız Qazax, Tovuz, Ağstafa, Gədəbəy, Daşkəsən, Kəlbəcər, Laçın, Qubadlı, Zəngilandan ibarət olduğunu və bunlardan kənarda Qərbi Azərbaycanın olmadığını, ola bilməyəcəyini iddia edir. Və uzaq başı Naxçıvanı da Qərbi Azərbaycan saya biləcəklərini minnətlə bildirir.

Sitat:

"1. Qərbi Azərbaycan Qazax, Tovuz, Ağstafa, Gədəbəy, Daşkəsən, Kəlbəcər, Laçın, Qubadlı, Zəngilandır, bunlardan kənarda Qərbi Azərbaycan yoxdur və ola bilməz, əgər onlar doğrudan da başqa yerə baxmaq istəyirlərsə, Naxçıvanı da Qərbi Azərbaycan saya bilərik;

2. Qərbi Ermənistan Armavir, Talin və Maralikdir. Bunun xaricində Qərbi Ermənistan yoxdur və ola da bilməz;

3. Şərqi Ermənistan İcevan, Berd, Çəmbərək, Vardenis, Cermuk, Goris, Qafan, Nerkin Hand və Nrnadzordur. Bunun xaricində Şərqi Ermənistan yoxdur və ola da bilməz;

4. Azərbaycan Ermənistanın qaçqın hüquqları məsələsini "Qərbi Azərbaycan” çətiri altında müzakirə edilməsində israr edir. Qərbi Azərbaycan və buna bənzər şeylərlə aydındır ki, beynəlxalq hüququn subyekti olan Ermənistan Respublikasının ərazi bütövlüyünü şübhə altına almağa və Ermənistana qarşı ərazi iddiaları irəli sürməyə çalışırlar. Bu məsələni müzakirə etmək üçün Azərbaycan “Qərbi Azərbaycan” ritorikasından və bu kimi bəyanatlardan imtina etməlidir...".

(sitatın sonu)

Bu paylaşımın ümumi ruhundan və xüsusən də 4-cü bəndin məzmunundan görünən budur ki, Paşinyan bizim Qərbi Azərbaycana qayıdış tələbimizi qəsdən beynəlxalq ictimaiyyətə Azərbaycan Respublikasının Ermənistan Respublikasına ərazi iddiası kimi təqdim edir. Halbuki biz "Qərbi Azərbaycan" adı altında nəzərdə tutduğumuz tarixi torpaqlarımızın (indiki Ermənistan ərazilərinin) Azərbaycana birləşdirilməsini yox, 1988-ci ilin dekabrında həmin ərazilərdən qovulmuş Azərbaycan türklərinin (biz onları tarixi kontekstdən çıxış edərək Qərbi azərbaycanlı adlandırırıq) öz yurdlarına qayıdışına icazə verilməsini tələb edirik. Paşinyan isə burada ənənəvi hay həyasızlığına yol verərək Qərbi Azərbaycana qayıdış məsələsi ilə tarixi "Qərbi Azərbaycan" anlayışını qatıb qarışdırır və nəticə etibarilə beynəlxalq ictimaiyyətdə də çaşqınlıq yaradır.

Tarix və coğrafiya bilgisi zəif olan Paşinyanın nəzərinə çatdırırıq ki, hazırda İranın tərkibində olan Qərbi Azərbaycan bizim nəzərdə tutduğumuz Qərbi Azərbaycan deyil. Və onun öz paylaşımında sadaladığı mövcud Azərbaycan rayonları da bizim nəzərdə tutduğumuz Qərbi Azərbaycan deyil.

Biz Qərbi Azərbaycan deyərkən ən azı son 600 ildə (Qaraqoyunluların, Ağqoyunluların, Səfəvilərin, Əfşarların, Qacarların, çar Rusiyasının, Azərbaycan Xalq Cümhuriyyətinin və keçmiş SSRİ-nin dövründə) Azərbaycan türklərinin yaşadığı indiki Ermənistanın şəhər və bölgələrini nəzərdə tuturuq. Elə Ermənistanın birinci prezidenti olmuş irqçi-faşist Levon Ter-Petrosyan da məlum videoçıxışında son 600 illik arzularından danışarkən Ermənistanın 3 böyük rayonunda və Zəngəzur mahalında Azərbaycan türklərinin üstünlük təşkil etdiyini etiraf edir. Bunu anlaması üçün Paşinyanın akademik tarix təhsili almasına əsla ehtiyac yoxdur. Ancaq əfsuslar olsun ki, Paşinyan yenə də vicdansızlıq edərək "Qərbi Azərbaycan" məfhumu üzərindən söz oyunu ilə məşğul olur.

Bu da o deməkdir ki, biz Paşinyana tarix və coğrafiya dərsi yox, Dəmir Yumruq dərsi keçməliyik. Çünki bütün haylar kimi Paşinyan da yalnız bu dərsi yaxşı anlayır.