BOKS

-------------------

Azərbaycan ev sahibliyi etdiyi beynəlxalq turnirdə birinci yeri tutub

Azərbaycan boksunun banilərindən biri olan Abbas Ağalarovun xatirəsinə həsr edilən və Boks Mərkəzində gənc boksçular arasında keçirilən ənənəvi beynəlxalq turnir başa şatıb. Qeyd edək ki, beş gün davam edən turnirdə ev sahibi Azərbaycanla yanaşı, Rusiya, Qazaxıstan, Özbəkistan, Tacikistan, Səudiyyə Ərəbistanı yığması və Litvanın "Royal" klubunun üzvləri mübarizə aparıblar. Ümumiyyətlə, turnirdə medallar uğrunda 13 çəki dərəcəsi üzrə 97 boksçu rinqə çıxıb.  Azərbaycan Boks Federasiyasından verilən məlumata görə, baş məşqçisi Elburus Rzayev olan yığmamız turnirdə 5-i qızıl, 4-ü gümüş və 13-ü bürünc əyarlı olmaqla 22 medal qazanıb ki, bu da yığmamıza komanda hesabında birinci yeri tutmaq imkanı verib. Yığmamızın aktivinə yazılan medallara gəlincə, qızılları bütün döyüşlərini qələbə ilə bitirən Bilalhəbəşi Nəzərov, Zidan Hümbətov, Tağı Nəsibov, Məhəmmədəli Qasımzadə və Abbasqulu Şadlinski, gümüş medalları yalnız həlledici finalda uduzan Məhəmmədəli Aşurəliyev, Mircəlal Mirağayev, Ruslan Qəhrəmanov və Orxan Ağayev qazanıb. Bürünc medallar isə çıxışını 3-cü pillədə başa vuran Ayaz Tağızadə, Sabir Dadaşov, Ömər Aslanlı, Tofiq Zairov, Mehrab Abbasov, Hüseyn Hacıyev, Ayxan Əliyev, Fuad Babayev, Şamil Nəcəfov, Şahin Dadaşov, Rza Novruzov, Kənan Nəcəfov və Həsən Sadıqzadənin aktivinə yazılıb. 

Turnirdə komanda hesabında ikinci yeri Qazaxıstan (4-5-7) tutub. İlk “üçlüy”ü isə Tacikistan (2-1-1) tamamlayıb.

Birincillikdə müxtəlif nominasiyalar üzrə fərqlənən boksçular da təltif olunublar. Turnirdə ən yaxşı boksçu adına tacikistanlı Ruslan Qafarov layiq görülüb. Azərbaycanlı  referi Anar Nağdıyevsə  ən yaxşı hakim adına sahib olub.

İNTİQAM Məmmədov