Bəybala Mirzəyev:

QAZAXLAR

Təyyarə qəzası bizi - Azərbaycan və Qazaxıstanı, bu iki türk xalqını bir-birinə daha da yaxınlaşdırdı.

"Əsl dost dar gündə bilinər" sözünü ulularımız, böyüklərimiz düz deyiblər. Qazax türkləri bu sınaqdan üzüağ çıxdılar. Bütün Qazax xalqı bu faciəli günümüzdə yanımızdadır.

Qazaxıstanlı gənclər könüllü surətdə qan mərkəzlərinə gedib, təyyarə qəzasında yaralananlar üçün qan bağışlayırlar.

Xüsusən də Aktau şəhərinin sakinləri bu işdə çox fəallıq göstərdilər. Onlar qəzanın baş verməsindən sonrakı ilk dəqiqələrdə sağ qalan sərnişinlərin, yaralıların təyyarədən çıxarılmasında da köməklərini əsirgəməmişdilər.

Sosial şəbəkələr üzərindən başsağlığı rəyləri yazan Qazaxıstan vətəndaşları da həddindən çoxdur.

Bir qazax türkü sosial şəbəkədəki rəyində təyyarə qəzasında həlak olanlara xitabən yazmışdı ki, "bağışlayın ki, bizim torpağımız qardaşlarımızın xilas yeri ola bilmədi". Bu rəy məni çox duyğulandırdı. Çünki əsl qardaşlıq yanğısı vardı bu rəydə.

Eləcə də Azərbaycanın Astanadakı səfirliyinin və Aktaudakı konsulluq binasının önünə əklil qoyan, qəzada həlak olanların ruhu üçün dua edən qazaxıstanlıların da həmrəyliyi təqdirə layiqdir.

Madi Raimov, Gulnara Abisheva kimi Qazaxıstan ziyalıları da xalqımıza başsağlığı verir, dərdimizi bölüşürlər.

Bir sözlə, qazaxıstanlıların dərdimizə şərikliyini hər addımda hiss etmək, görmək mümkündür. Bütün bunlar sözsüz ki, hər birimizdə isti hisslər yaradır. Qardaş dəstəyini bu qədər yaxından hiss etmək çox xoşdur.

Onlara gerçəkdən də böyük bir alqış düşür. Dəstəyinizə və həmrəyliyinizə görə sağolun, var olun, Qazax qardaşlarımız!

Türkiyə, Özbəkistan, Qırğızıstan da yanımızdadır. Bu dost və qardaş ölkələrin həm rəsmiləri, həm də sıravi insanları bizə başsağlığı verir, köməklərini təklif edirlər. Türkiyə Prezidenti Rəcəb Tayyib Ərdoğan isə təyyarəmizin qəzaya uğramasının nəticələrini və səbəblərini xüsusi olaraq diqqətdə saxlayır.

Qardaşlıq və insanlıq borcunu yerinə yetirən bütün hər kəsə sayğılar və təşəkkürlər!