GÜCLÜ AZƏRBAYCAN, YENİ LİDER

“İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.

Ümummilli lider Heydər Əliyev

21 il öncə ölkəmizin prezidenti seçilərkən demişdi: “Mən hər bir azərbaycanlının Prezidenti olacağam”. Hazırda ömrünün 63-cü ilində İlham Əliyev xalqın ona etimadını layiqincə doğruldub. O, nəinki xalqın sevimli liderinə, dünyanın qəbul etdiyi qəyiyyətli, mahir siyasətçiyə, görkəmli dövlət xadiminə çevrilib. 

Parlaq sabahımıza hesablanmış siyasi xətt ləyaqətlə davam etdirilir. O, buna dünyanın müdrik siyasətçisi Ulu Öndər Heydər Əliyevin zəngin dövlətçilik təcrübəsini dərindən mənimsəməklə nail olub, desək yanılmarıq. 

Bir yazıda Prezidentimizin əldə etdiyi nailiyyətləri vurğulamaq imkansızdır.

Respublikamızın iqtisadi-siyasi imkanları genişləndirilib, beynəlxalq arenadakı mövqeyi möhkəmləndirilib.

Müzəffər Ali Baş Komandanımızın rəhbərliyi, xalqın birliyi və Ordumuzun gücü ilə qazanılan Qarabağ Zəfəri Azərbaycanın 30 ildən bəri taleyüklü məsələlərindən biri idi.

İşğal vaxtı viran qoyulmuş torpaqlarımız bu gün sürətlə dirçəlir. Əzəli yurd yerlərinə böyük qayıdış 2030-cu ilədək beş Milli Prioritetdən biridir. 

Ötən dövr ərzində müasir inkişaf yolu keçən Azərbaycanda dövlət başçısının rəhbərliyilə gerçəkləşən genişmiqyaslı islahatlar ölkə həyatının bütün sahələrini, əhatə edir. Böyük infrastruktur layihələrin uğurlu icrası, regionların sosial-iqtisadi inkişafı, səhiyyə, təhsil, nəqliyyat sisteminin yenidən qurulması, kənd təsərrüfatı sahəsində ərzaq təhlükəsizliyinin təminatı, aqrar sektorun innovativ əsaslara keçirilməsi, eləcə də sosial məsələlərin həlli ilə bağlı zəruri tədbirlər davam etdirilməkdədir. Demək olar ki, ölkəmizdə həyatın bütün sahələri yenilənir. 

Uğurlu enerji siyasəti nətisəcində ölkəmizin dünyaya çıxışı təmin edilib.

Azərbaycan Milli Olimpiya Komitəsinin Prezidenti İlham Əliyev ölkədə idmanın inkişafına böyük diqqət yetirir ki, bu da gənc nəslin sağlam böyüməsinə mühüm töhfədir.

Bu gün dünyada etibarlı tərəfdaş kimi tanınan Azərbaycan mötəbər beynəlxalq tədbirlərə evsahibliyi edir. Təkcə onu qeyd etmək kifayətdir ki, ən böyük beynəlxalq konfransın – BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) Bakıda keçirilməsi dövlətimizə, onun rəhbərinə dünya ictimaiyyətinin hörmət və rəğbətinin ifadəsidir. 

Dövlət başçısının vurğuladığı kimi, əldə etdiyimiz bütün uğurlarımızın təməlində ölkədəki sağlam ictimai-siyasi mühit, xalq-iqtidar birliyi dayanır. 

Əminliklə deyirik ki, Cənubi Qafqaz, xüsusilə regionun lider dövləti olan Azərbaycanımızın davamlı inkişafı naminə qətiyyətli mövqe sərgiləyən Prezidentimizə inamımız sonsuzdur.  Və liderimizin ətrafında “dəmir yumruq” kimi birləşməyə hər an hazırıq.

Ceyhun BƏŞİROV,

Lənkəran-Astara Regional Mədəniyyət İdarəsinin Masallı nümayəndəliyi YAP ərazi partiya təşkilatının sədr