Prezident Kuboku-2024-ün püşkatma mərasimi olub

Dekabrın 14-də Binə Atçılıq Mərkəzində çövkən oyunu üzrə sayca 11-ci olan növbəti Prezident Kuboku-2024-un püşkatma mərasimi keçirilib. Püşkatmadan öncə Azərbaycan Respublikasının Atçılıq Federasiyasının baş katibi Bəhruz Nəbiyevin iştirakı ilə mətbuat konfransı olub. 

Peşəkar Çövkən Liqasının ötən mövsümü ilə bağlı məlumat verən Nəbiyev, eyni zamanda qış transfer pəncərəsinin açılmasından və 2025-ci il mövsümündə tətbiq ediləcək yeniliklərdən danışıb.

Bunun ardından isə Prezident Kuboku -2024-un püşkatma mərasimi keçirilib. Məlum olub ki, sözügedən turnirdə 8 komanda 2 qrupda (A və B) mübarizə aparacaq. A qrupunda "Sərhədçi", "Zəfər", "Embovood" və "Şirvan", B qrupunda isə "Polad", "Omar", "Elit" və "Köhlən" klubu yer alıb.

Qrup oyunları 16-20 dekabr günlərində Binə Atçılıq Mərkəzinin qapalı meydanında keçiriləcək. Reqlamentə görə, qruplarda ilk iki yeri tutan komandalar yarımfinala yüksələcək. Yarımfinal oyunları dekabrın 23-də həmin məkanda olacaq (saat 15:00).

Ertəsi gün isə saat 19:00-da üçüncü yer uğrunda, saat 20:00-da isə həlledici final oyunu baş tutacaq. 

Ümumiyyətlə, turnirin oyunları hər gün saat 15:00-dan başlayacaq və CBC TV-də canlı yayımlanacaq.

İNTİQAM Məmmədov