Cüdoçuların ölkə çempionatı davam edir 

İlk günün qalibləri bəlli olub

Dünən Bakı İdman sarayında kişi və qadınlar arasında cüdo üzrə seçmə xarakterli Azərbaycan çempionatına start verilib. Çempionatın ilk günü 178 tatami ustası 7 çəki dərəcəsində medallar uqrunda mübarizəyə qatılıb. Qadınlar 63, 70, 78 və +78 kq çəki dərəcəsində, kişilərdə 60, 66 və 73 kq-da çıxış ediblər. Qadınlar arasında Fidan Əlizadə (63 kq), Günel Həsənli (70 kq), Nərmin Əmirli (78 kq) və Nigar Süleymanova (+78 kq) bütün görüşlərini qələbə ilə başa vuraraq öz çəkisində Azərbaycan çempionu adını qazanıb.

Kişilər arasında isə Hüseyn Allahverdiyev (60 kq, Cüdo klubu), Rəşad Vəlkiyev (66 kq, Konakan TT) və Rəşid Məmmədəliyev (73 kq, Atilla İK) bütün rəqiblərini üstələyərək ölkə çempionu olub. Çempionatın ilk gününün diqqət çəkən məqamlarından biri ölkəmizi uzun müddət beynəlxalq arenalarda layiqincə təmsil edən, AÇ, DC və Böyük Dəbilqə turnirlərində fərqlənən Balabəy Ağayevin (60 kq) öz çəkisində yalnız üçüncü yeri tutması olub.

Bu gün isə daha 120 tatami ustası 7 çəkidə çempionları müəyyən etmək üçün mübarizəyə qatilacaq. 

Kişilər 81, 90, 100 və +100 kq-da, qadınlarda 58, 52 və 57 kq çəkidə mübarizə aparacaqlar.

İNTİQAM Məmmədov