Bakıdan kiçik ada dövlətlərinə dəstək çağırışı

“Azərbaycan kiçik ada dövlətlərinə özünün birmənalı dəstəyini nümayiş etdirir.”

                                                                 Prezident İlham Əliyev

Artıq bir neçə gündür ki, respublikamızın paytaxtı Bakı şəhərində BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində bir sıra mühüm tədbirlər keçirilməkdədir. Uğurla davam edən bu tədbirlər zamanı dünyadakı aktual iqlim dəyişmələrilə bağlı müzakirələr aparılır. 

İnkişaf etməkdə olan kiçik ada dövlətlərinin (SIDS) Sammiti də səmərəli müzakirələr və maraqlı mesajlarla yadda qalıb.

Öncə nəzərə çatdıraq ki, kiçik ada dövlətlərinin bu möhtəşəm tədbirə dəvət olunması onların suverenliyinə dəstəyin bir ifadəsidir, desək yanılmarıq.  

Sammitdə Azərbaycan Respublikasının Prezidenti İlham Əliyevin çıxışındakı real faktlara və humanizmə söykənən fikirləri bir daha bunun əyani sübutudur.

Ölkə rəhbərimiz müstəmləkə keçmişi olan ölkələrə müraciətində iqlim dəyişmələrinin fəsadlarından qorunma yönümündə kiçik ada dövlətlərinə maddi və texniki dəstəyin vacibliyini xüsusi qeyd edib: “Azərbaycan kiçik ada dövlətlərinə özünün birmənalı dəstəyini nümayiş etdirir. Biz fəlakət qarşısında zəif olan bir sıra ölkələrə qasırğa, zəlzələ və daşqınların təsirini azaltmaq üçün yardım göstərmişik. Biz, həmçinin su təchizatı, qida təhlükəsizliyi və mədəni irsin bərpası layihələrinə dəstək vermişik. Ondan çox kiçik ada dövləti Azərbaycan universitetlərində təhsil almaq üçün tələbə təqaüdü proqramımızdan yararlanıb. Qoşulmama Hərəkatında dördillik sədrliyimiz dövründə biz 80-dən artıq ölkəyə, o cümlədən 20 kiçik ada dövlətinə maliyyə və humanitar yardım göstərmişik.” 

Kiçik ada dövlətlərinin birliyinin təmin edilməsi uğrunda Möhtərəm Prezidentimizin son illər həyata keçirdiyi tədbirlər artıq nəticələrini verməkdədir. 

Azərbaycan Qoşulmama Hərəkatının, eləcə də COP29-un sədri kimi kiçik ada dövlətlərini gələcəkdə də dəstəkləməkdə davam edəcəyini bildirən cənab İlham Əliyev əlavə edib ki, biz Millətlər Birliyinin kiçik ada dövlətlərindəki birgə layihələrini dəstəkləmək üçün 10 milyon ABŞ dolları məbləğində vəsait ayırırıq. Ətraf mühitin monitorinqi və qiymətləndirilməsi üçün Azərbaycanın Kosmos Agentliyi – “Azərkosmos”dan peyk məlumatlarından istifadə etmək üçün Millətlər Birliyi ilə Anlaşma Memorandumu imzalanmışdır.”

Müstəmləkəçiliyə, siyasi-iqtisadi, milli-mənəvi istismara qarşı olan Azərbaycan dövlətinin rəhbəri çıxışında Fransanın bəzi ərazilərdə törətdiyi cinayətlərdən bəhs edib və və bu kimi halların yolverilməz olduğunu diqqətə çatdrırıb: “Siyasi korrupsiya rəmzinə çevrilmiş iki təsisat – Avropa Parlamenti və Avropa Şurası Parlament Assambleyası günahsız insanların qətlinə görə Prezident Makronun hökuməti ilə məsuliyyəti bölüşür.” 

Kiçik ada dövlətlərinin başçıları da çıxışlarında COP29-dan faydalanacaqlarını əminliklə ifadə ediblər.

Ümidvarıq ki, COP29-un ölkəmizdə keçirilməsi dövlətimizin beynəlxalq nüfüzunun göstəricisi olduğu təqdirdə kiçik ada dövlətlərinə dəstək göstərilməsi çağırışları kimi Bakıdan irəli sürülən digər nəcib təşəbbüslər iqlim dəyişmələrinin fəsadlarının aradan qaldırılmasına yeni töhfələr verəcək.

Zamin MƏMMƏDOV,

YAP Masallı rayon təşkilatının fəal üzvü.