Rəşad Məcid: 

5 il əvvəl belə bir səfər hər birimizə fantastik bir hekayənin süjeti kimi gələ bilərdi..

“Qarabağ” futbol komandasının heyətiylə birlikdə Bakıdan təyyarə ilə Füzuliyə uçmaq, Qırmızı Bazardan, Xankəndinin yanından keçərək Şuşaya qalxmaq, səhərisi gün Xankəndi stadionunda “Qarabağ”la MOİK-in oyununu izləmək.

Beş il əvvəl belə bir səfər hər birimizə ya yuxu, ya da fantastik bir hekayənin süjeti kimi gələ bilərdi.

Amma bu möcüzə reallığa çevrildi.

...Xankəndidə stadiondayıq. Oyunun başlamasına az qalmış Azərbaycan Prezidenti İlham Əliyevlə Birinci xanım Mehriban Əliyevanın stadiona gəlişi böyük coşğu ilə qarşılanır.

Oyundan əvvəl çıxışına “Əziz dostlar, Xankəndiyə xoş gəlmisiniz!” –sözləri başlayan dövlətimizin başçısı qısa nitqində heç kəsi və heç nəyi unutmur: stadiondakı şəhid uşaqlarına, onların ailə üzvlərinə ehtiramını ifadə edir, Xankəndinin qədim Azərbaycan diyarı olduğunu, bu kəndin təməlinin Qarabağ xanı tərəfindən qoyulduğunu, sonrakı illərdə Azərbaycanın vəsaiti hesabına böyük şəhərə çevrildiyini xatırlatdır, bu stadionun cəmi iki ay ərzində yenidən əsaslı təmir olunduğunu vurğulamaqla separatizm simvolikasını əks etdirən bütün yazıların silindiyini bildirir, bir neçə aydan sonra Ağdam şəhərində “İmarət” stadionunun yenidən inşaasına başlanılacağının müjdəsini verir.

Oyun boyu stadionda şəhid övladları ilə birlikdə əyləşən dövlət başçısının bu alicənab davranışı isə xüsusi rəğbət doğurdu. Ümumiyyətlə, dünən stadiondakı mənzərəni müşahidə edərkən bir neçə dəfə kövrəldim, ən çox da Prezidentin çıxışında və alicənab davranışlarındakı kübarlıqdan və səmimiyyətdən təsirləndim.

Dövlət başçısının çıxışındakı bir nüans isə, zənnimcə, təkcə bir futbol oyunu haqqında fikirlər yox, həm də Qalib Liderin hər zaman üçün Azərbaycanla bağlı böyük arzularının ifadəsi idi: “Bugünkü oyunun nəticələrindən asılı olmayaraq qalib bəllidir. Qalib Azərbaycan xalqıdır, Azərbaycan dövlətidir!”