Bəybala Mirzəyev: 

Molla rejimi COP29 sayəsində münasibətləri normallaşdırmaq üçün fürsət qazanır

Ötən günün ən önəmli xəbərlərindən biri də Pezeşkianın Azərbaycana səfərinin təsdiqlənməsi oldu. Belə ki, rəsmi Tehran bildirib ki, İran Prezidenti Məsud Pezeşkian COP29-da iştirak etmək üçün gələn həftə Bakıya səfər edəcək.

Deməli, bu onu göstərir ki, molla rejiminin panfarsçı qanadı (o cümlədən SEPAH) hər nə qədər ölkəmizə qarşı kin bəsləsə də, lakin buna rəğmən dərk edirlər ki, Pezeşkianın prezident kimi fəaliyyətə başladığı son 3-4 ay ərzində artıq ABŞ-a, İraqa, Türkmənistana və Rusiyaya səfər etdiyi halda, coğrafi cəhətdən ən yaxın qonşusu olan Azərbaycana səfərdən boyun qaçırması İran dövləti üçün əsl rüsvayçılıq olar və maskalarının tamamən düşməsi ilə nəticələnər.

Ona görə də uzun götür-qoy və tərəddüdlərdən sonra nəhayət ki, İranın ali dini rəhbəri Xamenei Pezeşkianın COP29-da iştirak etmək üçün Azərbaycana səfər etməsinə son anda razılıq verdi.

Pezeşkian özü də dərk edirdi ki, əgər Bakıya gəlməkdən imtina etsə, o zaman seçki öncəsi təbliğat kampaniyasının gedişində onun qonşu ölkələrlə (xüsusən də Azərbaycan və Türkiyə ilə) münasibətlərin yaxşılaşdırılmasının vacibliyi barədə etdiyi çıxışların saman çöpü qədər də əhəmiyyəti qalmayacaq və gözdən düşəcək.

Hərçənd ki, İranın panfarsçı deputatları və mediası Pezeşkianın Bakıya səfərinin əngəllənməsi üçün təxribatçı çağırışlar etməkdən də çəkinmirdilər. Eləcə də mənfur SEPAH da Pezeşkianın COP29 tədbirinə qatılmasının qarşısını almaq üçün əlindən gələni etdi. Çünki İranın xarici siyasətinə ayətullah Xamenei ilə bərabər, SEPAH da nəzarət funksiyasını həyata keçirir.

Lakin bu dəfə İslam İnqilabı Keşikçiləri Korpusu (SEPAH) və digər panfarsçı qüvvələr fakt qarşısında çıxılmaz vəziyyətdə qaldılar. Pezeşkianın Bakıya səfərini ləğv etmək üçün onların əlində heç bir tutarlı səbəb yox idi. Ona görə də bu dəfə panfarsçı qüvvələr yox, Azərbaycanla münasibətlərin yaxşılaşdırılmasının vacibliyini anlayan, adekvat düşünə bilən islahatçı qanad qalib gəldi və İranın onsuz da zədəli olan, deformasiyaya uğrayan sifətinin (imicinin) qorunub saxlanılması üçün Pezeşkianın Azərbaycana gəlişinə razılıq verildi.

Bax belə.

Molla rejimi COP29-un sayəsində Azərbaycanla münasibətləri normallaşdırmaq və yandırdığı körpüləri bərpa etmək üçün, necə deyərlər, əla fürsət qazanır.