Şəhidin xatirəsinə yoldaşlıq görüşü - “Mil” (Beyləqan)-“Ərkivan” (Masallı) 

Beyləqanda Vətən müharibəsi şəhidi Pərvin Vüqar oğlu Əliyevin (27.10.1997-28.09.2020) xatirəsi anılıb. Şəhidin adını daşıyan Qəhrəmanlı qəsəbə stadionunda təşkil olunan tədbirdə Beyləqan və Masallı rayonunun rəsmiləri, şəhidin valideynləri və digər şəhid ailələri, müharibə iştirakçıları, ictimaiyyət nümayəndələri iştirak ediblər. 

Şəhidin doğum gününə həsr olunmuş tədbirə qatılanların bir qismi Pərvin Əliyevin məzarını ziyarət edib, üzərinə əklil və gül dəsətələri düzüblər.

Açılış mərasimi öncəsi dövlət himnimiz səsləndirilib, şəhidlərimizin xatirəsi bir dəqiqəlik sükutla yad olunub.

Çıxışlarda bu cür tədbirlərin keçirilməsinin yeniyetmə və gənclərimizdə milli vətənpərvərlik hissinin artırılmasında, onların arasında dostluğun möhkəmlənməsində, eləcə də sağlam həyat tərzinin təşviqində  önəmi vurğulanıb, 44 günlük Vətən müharibəsi zamanı Müzəffər Ali Baş Komandanımızın rəhbərliyi, qüdrətli Ordumuzun və Pərvin kimi igidlərimizin şücaəti ilə müasir-müstəqil Azərbaycan tarixində qızıl səhifələr yazıldığı diqqətə çatdırılıb.

Məktəblilər Vətənə, torpağa, şəhidlərə həsr edilmiş şeirlər söyləyiblər.

Sonra şəhid Pərvin Əliyevin xatirəsinə Beyləqanın “Mil” və Masallının “Ərkivan” komandaları arasında yoldaşlıq görüşü keçirilib. Qarşılaşma bərabərliklə yekunlaşıb – 1:1.

Sonda təşkilatçılar və komanda üzvləri Beyləqan Rayon İcra Hakimiyyətinin başçısı Əziz Əzizov, Lənkəran-Astara Regional Gənclər və İdman İdarəsinin Masallı rayon sektorunun rəisi Sabiq Cahangirov və “Ərkivan-Transport” beynəlxalq yükdaşıma şirkətinin rəhbəri Abdulla Abdullayev və digər şəxslər tərəfindən müxtəlif qiymətli hədiyyələr və diplomlarla mükafatlandırılıblar.

Şəhidin valideynləri tədbirin təşkilatçılarına minnətdarlıqlarını bildiriblər.

Akif AĞAYEV,

Azərbaycan İdman Jurnalistləri Assosiasiyasının üzvü.