Eyni gündə dəfn olunan 3 şəhid

21 oktyabr tarixi Sumqayıtda üç şəhidin anım günü idi. Şəhid Ülvü Məhərrəmovun, şəhid Sərxan Əliyevin və şəhid Əlizamin Mustafalının vətən torpağına qovuşduğu gündən 4 il ötür. Hər üç şəhidimiz 44 günlük Vətən müharibəsinin qələbə tarixini qanıyla yazıb. Sumqayıt sakinləri, şəhid anaları və şəhidsevərlər əvvəlcə Sumqayıt Şəhidlər Xiyabanında Şəhidlərimizin məzarını ziyarət ediblər. Daha sonra isə ayrı-ayrılıqda şəhid ailələri tərəfindən şəhidlərimizin adına ehsan süfrələri təşkil olunub. Ülvü Məhərrəmovun əmisi Mirzə Məhərrəmov ilk Qarabağ savaşında itkin düşən şəhidlərimizdən biridir. Onun da şəkli Ülvü Məhərrəmovun məzarında yer alıb. Ülvü Məhərrəmov və Sərxan Əliyev subay şəhidlərimizdən idi. Əlizamin Mustafalının isə iki övladı vətənə əmanət qalıb. Şəhidlərin anım tədbirində Xaçmaz şəhidimiz Fəxrəddin Fərəcovun bacısı Rübabə xanımla birlikdə iştirak etdik. Rübabə xanım hər üç şəhidimizin anasına şəhidlərimizin yer aldığı çərçivə hədiyyə etdi. Mən isə şəhidlərimizə həmin an yazdığım şeirləri hədiyyə etdim. Qeyd edim ki, şəhid Tacəddin İsmayılzadənin anası da qeyri - adi həfiyyəsi ilə şəhid ailələrini sevindirmişdi.

Ruhları şad olsun qəhrəmanlarımızın!

Sərxanım, şəhidim
(şəhid Sərxan Əliyevin xatirəsinə) 

Yenə gözlərimdən süzülüb düşən, 
Hər damla göz yaşı yandırır məni. 
Ömrümün dörd ili sənsiz keçsə də,
Gözlərim hər yerdə axtarır səni. 

 Səsinə, üzünə həsrət qalmışam, 
Qəlbim yuxulara yalvarır gecə. 
Deyirəm, ay oğul, ey şəhid balam, 
Nə olar yuxuma gəlsən gizlicə.

Gəl öpüm, qoxlayım tellərini mən, 
Qollarım boynuna dolansın yenə. 
Yuxular cənnətə körpümüz olsun
Gəl bala, yuxuda qovuşum sənə.

Sərxanım, şəhidim, günəşim idin, 
Sən getdin günəş də isitmir daha. 
Mənim ürəyimdə yanan atəşin, 
Mənimlə birlikdə çıxır sabaha. 
 

Dörd ildir yoxsan Ülvüm

Şəhid Ülvüm, bu gün il dönümündür, 
Yenə doğmaların gəlib görüşə. 
Məzarın başında gözlər yol çəkir, 
Hər kəs yol eyləyir sənli keçmişə. 

Atanın saçları ağarıb, şəhid, 
Anan göz yaşını saxlaya bilmir. 
Bacın qardaş deyib axtarır səni, 
Qəlbinin həsrəti bitmir ki, bitmir. 

Seyr etdim onları yandı ürəyim, 
Bağrımın başından qopdu nalələr. 
Dedim ki, İlahi möcüzə ola, 
Şəhidlər qayıdıb geri dönələr. 

İllər sənsiz gəlir, sənsiz dəyişir,
Sən yoxsan mənasız olub həyat da. 
Sən idin, ay Ülvüm evin tək oğlu,
Sən idin atanın qolu-qanadı. 

Əlizaminin taleyi 
(şəhid Əlizamin Mustafalının xatirəsinə) 

Beyləqanda doğulmuşdun Əlizamin, 
Sumqayıtda böyümüsən zamanla. 
Doğmalaşdın Sumqayıtda hər kəsə, 
Tanıdılar səni hər bir məkanda. 

Bir nömrəli məktəbində oxudun, 
Məktəb ili xatirələr yaşatdı.
Üç nömrəli peşə məktəbindəsə,
İstedadın xariqələr yaratdı. 

Hərbi xidmət vaxtı gəlib yetişdi, 
Layiqincə xidmət etdin Vətənə. 
Sən könüllü yazılmışdın döyüşə, 
O meydanda qan uddurdun düşmənə.

Oktyabr aldı səni apardı, 
Döyüş vaxtı şəhadətə ucaldın. 
Doğma yurdun xilaskarı olaraq, 
"Şəhid" adlı ən şərəfli ad aldın. 

Esmira Günəş 
08.10.2024