Masallıda şəhid bacısı üçün ev tikilib 

Masallı rayonunun Banbaşı kəndində, Birinci Qarabağ müharibəsi şəhidi Sərhəddin Rəhimovun bacısı üçün fərdi yaşayış evi tikilib.

Rayonun Köçəkli kəndindən olan Birinci Qarabağ müharibəsi şəhidi Rəhimov Sərhəddin Yadulla oğlunun bacısı, 5 uşaq anası Rəhimova Fərqanə Yadulla qızı üçün “Sabahın 5 əsgərinə ev alaq" devizi altında həyata keçirilən lahiyəyə əsasən tiklilən evin ümumi sahəsi 80 kvadratmetr olmaqla, 3 otaq, 1 mətbəx və 1 sanitar qovşağdan ibarətdir. Mənzil tam təmirli olmaqla yanaşı bütün kommunal xidmətləri, mebel dəsti və digər məişət əşyaları ilə təmin olunub.

Fərdi yaşayış evi rayon rəhbəri Araz Əhmədovun təşəbbüsü, “Viləş” uşaq bağçasının direktoru Şəfa Allahverdiyevanın təşkilatçılığı, yerli sahibkar və xeyriyyəçilərin, Rusiya Federasiyasında yaşayan xeyirxah soydaşlarımızın maddi dəstəyilə inşa edilib.

Evin açılışında Masallı Rayon İcra Hakimiyyətinin başçısı Araz Əhmədov, millət vəkilləri Məşhur Məmmədov, Anar İsgəndərov, təşkilatçılar, dəstək olanlar, şəhid ailələri iştirak ediblər.

Ailə üzvləri onların mənzil şəraitin yaxşılaşdırılmasına görə Ölkə başçısı cənab İlham Əliyevə, Birinci vitse-prezident Mehriban xanım Əliyevaya, rayon rəhbərinə, eləcə də zəhməti olan hər kəsə minnətdarlıqlarını bildiriblər.

Akif AĞAYEV