Süleyman Şükürov DÇ-da üçüncü olub

Bu gündən daha iki medal şansımız var

Tacikistanın paytaxtı Düşənbədə gənc cüdoçular arasında keçirilən dünya çempionatı davam edir. Qeyd edək ki, ilk iki günü Azərbaycan yığması üçün uğursuz olan mundialın 4 oktyabra təsadüf edən üçüncü gününü bir qədər fərqli olub. Belə ki, həmin gün tatamiyə çıxan üç təmsilçimizdən biri - 81 kq-da güləşən Süleyman Şükürov çıxışını üçüncü yerdə bitirməklə bürünc medal qazanıb. O, üçüncüluk uqrunda görüşdə ev sahiblərindən olan Muhammod Yusifzodani məğlub edib. Bu Azərbaycan komandasının mundialda ilk medalı olub. 

Mundialın dördüncü günü (5 oktyabr) isə daha iki təmsilçimiz mübarizəyə qatılıb. Onlardan +100 kq-da çıxış edən Kənan Nəsibov daha yaxşı güləşərək finala çıxıb və bununla da ən pis halda çempionatın gümüş medalını özünə təmin edib. Mübarizəyə 1/8 finaldan qatılan Nəsibov həlledici finalda İJF bayraqı altında çıxış edən rusiyalı Denis Batsayevlə qarşılaşacaq.

Bu gün tatamiyə çıxan digər təmsilçilərimiz - Əjdər Baqirovsa (100 kq) ilk üç qələbədən sonra 1/2 finalda büdrəyib. O, bürünc medal uğrunda iranlı Əli Reza ilə güləşəcək.

Sabah qarışıq komanda yarışı ilə mundiala yekun vurulacaq.

İNTİQAM Məmmədov