Azərbaycan Anım Gününü qeyd edir

Azərbaycan 2020-ci ildə Ermənistanla 44 günlük müharibənin Qəhrəmanlarının Anım Gününü qeyd edir.

Azərbaycan xalqı Ermənistan Silahlı Qüvvələrinin növbəti təxribatına cavab olaraq 4 il əvvəl başlanmış və Azərbaycanın tarixi torpaqlarının uzunmüddətli erməni işğalına son qoyan “Dəmir yumruq” hərbi əməliyyatının qəhrəmanlarının xatirəsini ehtiramla yad edir. 

Prezident İlham Əliyevin sərəncamına əsasən, Vətən müharibəsində qəhrəmancasına döyüşmüş hərbi qulluqçuların xatirəsinə ehtiram əlaməti olaraq sentyabrın 27-si Azərbaycanda Anım Günü elan edilib.

Xatırladaq ki, Ermənistan Silahlı Qüvvələrinin işğal olunmuş Azərbaycan torpaqlarında yerləşən bölmələri 2020-ci il sentyabrın 27-si səhər saatlarından etibarən Azərbaycan ordusunun mövqelərini və cəbhə xəttində yerləşən yaşayış məntəqələrini növbəti dəfə irimiqyaslı atəşə tutmağa başlayıb. İri çaplı silahlar, artilleriya və minaatanlardan istifadə edilib. Güclü atışma nəticəsində mülki əhali və hərbi qulluqçular həlak olmuş, mülki infrastruktura ciddi ziyan dəymiş, bu da Azərbaycanın səbrini daşımışdır.

Ali Baş Komandan, Prezident İlham Əliyevin göstərişi ilə Azərbaycan ordusu cəbhə boyu əks-hücum əməliyyatına başlayıb.

Artıq ilk günlərdə bir neçə onilliklər işğal altında olan 6 kənd və bir sıra strateji yüksəkliklər azad edilib.

Ümumilikdə 44 gün ərzində Azərbaycan ordusu 5 şəhər, 4 kənd, 286 kənd, çoxlu sayda strateji yüksəkliyi erməni işğalından azad edib. 

Məğlubiyyətini etiraf edən Ermənistan təslim aktı imzalayıb və ona əsasən Azərbaycanın Ağdam, Laçın və Kəlbəcər rayonlarında işğal olunmuş ərazilərini azad etməyi öhdəsinə götürüb.

2020-ci il noyabrın 9-dan 10-na keçən gecə Rusiya və Azərbaycan prezidentləri Vladimir Putin və İlham Əliyev, eləcə də Ermənistanın baş naziri Nikol Paşinyanın imzaladığı üçtərəfli bəyanata əsasən, Ermənistan ordusu yuxarıda göstərilən ərazilərdən çıxarılıb.

2020-ci il noyabrın 20-də Azərbaycan ordusu 27 ildir işğal altında olan Ağdam rayonuna daxil olub. Noyabrın 25-də Kəlbəcər rayonu Azərbaycanın nəzarətinə qaytarılıb. Ermənistan silahlı qüvvələri 28 ildir işğal altında saxladıqları Laçın rayonunu 2020-ci il noyabrın 30-da tərk edib.

Hərbi əməliyyatlar başa çatdıqdan sonra Azərbaycan hökuməti işğaldan azad edilmiş ərazilərin bərpası üçün genişmiqyaslı “Böyük Qayıdış” proqramına start verib.