Məmməd Əvəzoğlu:

Ay Nabat

Gecənin bu vaxtında üzücü bir xəbər eşitdim- Nabat Xanım Məmmədova rəhmətə gedib. İxtiyar dostumun bu məlumatına əvvəl inamsız yanaşdım, Fb-u araşdırdıqca tələbə dostum Sultan Osmanovun yazısına rast gəldim və bu üzücü xəbərə inanmalı oldum. Nabat xanım Fb-da, demək olar ki, institutda dərs dediyi bütün tələbələrini başına yığa bilmişdi. Hamı onun xətrini istəyirdi, bütün bayramlarda, doğum günlərində hamı ona gözəl təbrik sözləri yazırdı. Nabat müəllimə mənim sevimli müəllimim olmaqla bərabər, həm də ən yaxın dostlarımdan biri, ən diqqətli oxucum idi. Hər bir şeirimi oxuyub, layiq olduğumdan artıq xoş sözlər, təriflər yazırdı. Mən onun rəylərinin hamısını saxlayırdım. Nabat xanımla bizim dostluğumuz tələbəlik dövründən başlamışdı. Xarici Dillər İnstitutunun ikinci binasında (həm də yataqxana idi) balaca bir otağım var idi. Böyük tənəffüsdə gələrdi, çay dəmləyərdim və mürəbbəli çay içə-içə şirin söhbət edərdik.Fb-da uzun illər dostluğumuz davam elədi. Həmişə də mürəbbəli çayı yadıma salardı. Bir şeirimdə o səhnələri nəzmə də almışam.Nabat müəllimə o hissəni ayırıb, altına rəy də yazaraq yenidən paylaşmışdı. Bu dediyim hissə aşağıdakı şəkillərdə var. Doğum günlərinin birində ona qəzəl də yazmışdım. Çox xoşuna gəlmişdi.

Ay Nabat

Tələbə ömrümüzün yadigarısan, ay Nabat,

Vüqarlı gəncliyimin tacidarısan, ay Nabat.

Həmişə yad edirəm məğrur, uca qamətini,

Dağlar övladlarının dağ vüqarısan, ay Nabat.

Gizlicə seyr eləyərdim bu mələk surətini,

Dedilər bir igidin nazlı yarısan, ay Nabat.

Nənəsən, indi qara tellərinə dən də düşüb,

Nəvə adlı mələyin nəğməkarısan, ay Nabat.

Qocalıqdan söz açıb girmə fəsildən fəsilə,

Xəzanlı ömrümüzün ilk baharısan, ay Nabat.

Səni görmək həvəsi hamımızın niyyətidir,

Tələbə dostlarımın intizarısan, ay Nabat.

Qələmim ilhamını indi də sizlərdən alır,

Bu Məhəmməd yazarın iftixarısan, ay Nabat!

14.05.2021.

Heyif ki, Nabat xanımı görmək şərəfi bizə qismət olmadı. Məzunluğumuzun 40-cı ilində Bakıda məclis keçirdik, dəvət elədik. Səhhəti yaxşı olmadığı üçün gələ bilmədi.Hiss eləmişdim ki, sağlamlığl yerində deyil, çünkü o ərəfədə Fb-a da girə bilmirdi.Yenidən görünəndə onu tanıyan tələbələrimizin hamısı çox sevindilər. Bu gün isə əksinə, hamı qəmlidir. Çünkü uzun illər sos.şəbəkələr vasitəsi ilə bizə əsl Ana qayğısı göstərən bir əziz insanımızı itirmişik. Bütün Nabat sevərlərə baş sağlığı verir və səbr diləyirəm. Allah sənə rəhmət eləsin, əziz dostumuz, müəllimimiz Nabat Xanım.