Millimiz Millətlər Liqasına məğlubiyyətlə başlayıb

Portogezli mütəxəssis Fernandu Santuşun millimizdəki debütü uğursuz olub

Bu gün futbol üzrə Millətlər Liqasının seçmə qrup oyunlarına start verilib. Bu turnirin C1 qrupunda yer alan Azərbaycan millisi doğma divarlar arasında İsveç yığmasını qəbul edib. Qeyd edək ki, portqaliyalı mütəxəssis Fernandu Santuşun rəhbərliyi altında ilk dəfə meydana çıxan Azərbaycan millisi doğma divarlar amilindən də yararlana bilməyib. Özünü heç də qonaq kimi aparmayan İsveç yığması Tofiq Bəhramov adına Respublika Stadionunda baş tutan və taleyi macarıstanlı referi Balaj Berkeyə həvalə edilən matçda millimizi 1:3 hesabla məğlub edərək rəzil günə qoyub. Bütün qollar matçın ikinci hissəsində vurulub. 65-ci dəqiqədə isveçli İsak Xin oyunda hesabı açıb - 0:1. 71-ci dəqiqədə isə o, dubla imza ataraq, hesabı 0:2-yə çatdırıb. Qarşılaşmanın 80-ci dəqiqəsində isə Viktor Dekereş millimizin qapısına təyin edilən penaltini dəqiq yerinə yetirməklə hesabı daha da artırıb - 0:3. Millimiz buraxdığı üç qolun əvəzində yalnız bir təsəlli qolu vura bilib - 1:3. Yeganə qolumuzun müəllifi isə 82-ci dəqiqədə Renat Dadaşov olub. 

Xatırladaq ki, matçın 45+5 dəqiqəsində millimizin forvardı Ramil Şeydayev rəqibin qapısına təyin edilən penaltidən yararlana bilməyib. 

İNTİQAM Məmmədov