Bəybala Mirzəyev: 

"Bir millət, iki dövlət" xəttinə heç bir kənar qüvvə mane ola bilməz

Ankaraya səfər edən Azərbaycanın xarici işlər naziri Ceyhun Bayramov Türkiyə XİN-in başçısı Hakan Fidan ilə müzakirələr aparıb.

Müzakirənin gündəliyi kifayət qədər genişdir. Türkiyənin xarici siyasət idarəsi görüş ərəfəsində bildirmişdi ki, Bayramov və Fidan ikitərəfli münasibətləri və regional məsələləri müzakirə edəcəklər.

İki qardaş ölkənin baş diplomatlarının bu görüşündə Azərbaycan-Türkiyə münasibətləri ilə yanaşı, Azərbaycan-Ermənistan sülh prosesi, Türkiyə və Ermənistanın normallaşma addımları, Zəngəzur dəhlizi ilə bağlı son gəlişmələr, Ukraynanın Kurska hücumu fonunda Rusiya qazının Azərbaycan üzərindən nəqli, İranın regiondakı fəallığı, İsrail-Fələstin hadisələrinə münasibət məsələsi və digər mövzular müzakirə olunub.

Regionumuzda və dünyada sürətli dəyişikliklərin, şok hadisələrin baş verdiyi hazırkı kritik dönəmdə Bakı və Ankaranın sıx təmasda olması sözsüz ki, vacibdir. Təsadüfi deyil ki, Ceyhun Bayramov da görüşdən sonra mətbuata açıqlamasında bildirdi ki, rəsmi Bakı bütün prosesləri diqqətlə izləyir və addımlarını Türkiyə ilə koordinasiya edir.

Bəli, belə də olmalıdır.

Və Türkiyə-Azərbaycan münasibətlərinə nə Türkiyənin Fələstin məsələsində aktivliyi, nə də Azərbaycanın Rusiya ilə əməkdaşlığı mənfi təsir göstərməməlidir.

Ümumiyyətlə, "Bir millət, iki dövlət" xəttinə heç bir kənar qüvvə, heç bir hadisə mane ola bilməz.