GÜLAĞA TƏNHA:

Xeyirli əməllər carçısı - Mehriban xanım Əliyeva

Bu bir gerçəklikdir, Heydər Əliyev Fondu yarandığı ilk vaxtlardan insanların ümid yerinə çevrilib. Fondun rəhbəri kimi Azərbaycanın birinci xanımı Mehriban xanım Əliyevanın yerinə yetirdiyi ictimai missiya, Milli Məclisin üzvü statusunda formalaşdırdığı millət vəkilliyi örnəyi, təşkilatçılıq qabiliyyəti, problemləri çevik həll etmək əzmi, insanları anlamaq, onların sevincini də, qayğısını da hiss etmək fəhmi onu hamıya doğmalaşdırdı. Ona görə də Azərbaycan vətəndaşları Mehriban xanım Əliyevanı dövlətin ali kürsülərində görməyi arzulayırdılar.

Azərbaycan Prezidenti 21 fevral 2017-ci il tarixli sərəncamı ilə vətəndaşlarımızın bu arzusunu reallaşdırdı. Mehriban xanım Əliyevanın Azərbaycan Respublikasının Birinci vitse-prezidenti vəzifəsinə təyin edilməsi vətəndaşlarda əminlik və özgüvən hissini daha da gücləndirdi. Bu təyinat ölkənin idarəetmə sistemində mütərəqqi irəliləyişlərin yeni vüsət alacağının, dövlət-vətəndaş münasibətlərində bürokratik baryerlərin tamamilə aradan qalxacağının müjdəsi idi.

İllərdir ki, Azərbaycan cəmiyyəti və dünya Mehriban xanım Əliyevanı uşaq evlərindəki, internat məktəblərindəki kimsəsiz körpələrin, qocalar evlərindəki ahılların doğma hamisi kimi tanıyır, sonsuz rəğbət bəsləyir. Dövlətimizin bu sahələrlə bağlı həmişə sosial proqramları olub, bu proqramlar ardıcıl şəkildə yerinə yetirilib. Birinci xanım Mehriban Əliyevanın yaratdığı fərq isə odur ki, o, dövlətə sığınmış kimsəsiz körpələrlə, ahıllarla bağlı proqramları hər hansı inzibati iş, dövləti vəzifəsi kimi həyata keçirməyib, bu yerlərin sakinlərinə doğma ana, doğma övlad kimi yanaşıb, onlara sahib çıxıb, öz məqsədyönlü fəaliyyətilə dövlət-vətəndaş münasibətlərini daha da yaxınlaşdırıb, vətəndaşın öz dövlətinə inam və güvənini hər gün daha da artırıb.

Mehriban Əliyevanın rəhbərliyi ilə dövlətimizin səhiyyə sahəsindəki sosial proqramları da xüsusi diqqətlə, hər bir detal nəzərə alınmaqla ciddi nəzarət altında və müasir tələblərə uyğun səviyyədə həyata keçirilib, sosial və səhiyyə xidmətləri vətəndaşlarımız üçün getdikcə daha əlçatan olur. Azərbaycanın Birinci vitse-prezidentinin təşəbbüsü və birbaşa təşkilatçılığı ilə həyata keçirilən əhəmiyyətli layihələr, Bakıda yaradılmış müasir Talassemiya Mərkəzi, Daun Sindromlu Şəxslərin Reabilitasiya Mərkəzi, Mərkəzi Neftçilər Xəstəxanasında Cərrahiyyə və Orqan Transplantologiya Mərkəzi, Psixonevroloji Uşaq Mərkəzi və digər səhiyyə ocaqları hər il minlərlə vətəndaşımızın həyatını xilas edir.

Bir neçə il öncə bütün dünyanı bürümüş koronavirus pandemiyasının ağır təhlükələr törətdiyi, insanların sağlamlığı üçün qapanmaların zəruri olduğu günlərdə Mehriban xanım Əliyevanın cəmiyyətimizə narahatlıq mesajlarını, çağırışlarını və bu addımların yaratdığı ictimai rəğbəti hamımız yaxşı xatırlayırıq.

Öz fəaliyyətində milli maraqları əsas tutan hər bir siyasətçinin ən vacib missiyası, ən böyük uğuru bilavasitə onun təmsil etdiyi ölkəsi və xalqı ilə bağlı olur. Azərbaycanın Birinci vitse-prezidenti, Yeni Azərbaycan Partiyası sədrinin birinci müavini, Heydər Əliyev Fondunun prezidenti, UNESCO-nun və ISESCO-nun xoşməramlı səfiri Mehriban xanım Əliyevanın çoxşaxəli fəaliyyəti də məhz bu rakursdan xüsusi diqqət çəkir. Mehriban Əliyeva həmişə cəmiyyəti narahat edən, dövlətimiz və xalqımız üçün müstəsna əhəmiyyət daşıyan məsələlərin həlli üçün çalışır və buna nail olur. O, başladığı və gördüyü bütün işlərdə qətiyyət, prinsipiallıq, xalqına və Vətəninə sonsuz məhəbbət nümayiş etdirir.

Azərbaycanın Birinci vitse-prezidenti Mehriban Əliyeva sosial məsələlərin həllinə daim xüsusi diqqət göstərir. Onun təşəbbüsü ilə genişmiqyaslı və ictimai əhəmiyyətli layihələr müvəffəqiyyətlə həyata keçirilir. Diqqətini əsasən sosial məsələlərin, xüsusilə də əhalinin həssas qruplarının problemlərinin həlli üzərində cəmləşdirən Mehriban Əliyevanın Birinci vitse-prezident kimi keçirdiyi ilk müşavirəni Bakı və Sumqayıt şəhərlərində yataqxanalarda müvəqqəti məskunlaşmış məcburi köçkün ailələrinin köçürülməsinə həsr etməsi bu müstəvidə xüsusi vurğulanmalıdır. Bəhs olunan müşavirədə müvafiq qurumlar qarşısında görüləcək işlərlə bağlı konkret vəzifələr müəyyənləşdirən Mehriban Əliyeva yeni mənzillərin, yeni binaların tikilməsi və inşa olunan binaların keyfiyyət standartlarına tam cavab verməsi ilə bağlı göstəriş verdi. İlkin mərhələdə dörd min köçkün ailəsinin yeni mənzillə, həmçinin iş yerləri ilə təmin edilməsi qərara alındı. Qısa müddətdə Lökbatan qəsəbəsində məcburi köçkünlər üçün 1026 mənzildən ibarət müasir yaşayış kompleksinin tikintisinə başlanıldı, qəzalı vəziyyətdə olan binalarda məskunlaşmış məcburi köçkün ailələrinə Abşeron rayonunun Masazır və Mehdiabad qəsəbələrində yeni mənzillər verildi, iş adamlarının prosesə cəlb olunması ilə bir çox ailə yeni inşa edilmiş tam təmirli mənzillərə köçürüldü, eyni zamanda, məcburi köçkün ailələrinin mənzil şəraitinin yaxşılaşdırılması məqsədilə digər rayon və qəsəbələrdə yeni binaların istifadəyə verilməsi istiqamətində məqsədyönlü və davamlı addımlar atıldı.

Mehriban Əliyeva xeyirxah əməllər carçısıdır. 2023-cü ilin fevral ayında qardaş Türkiyədə baş verən və Azərbaycan xalqını da sarsıdan zəlzələdən zərər çəkmiş insanlara yardım zərurətinin yarandığı anlarda da onu ön sıralarda gördük. Zəlzələdən dərhal sonra Mehriban xanımın təşkilatçılığı, yaxından iştirakı ilə yardım dolu təyyarələr, yük maşınları Türkiyəyə göndərildi, onun təşəbbüsü ilə respublikamızdakı vətəndaş cəmiyyəti institutlarının qardaş ölkəyə sistemli, mütəşəkkil dəstəyi təmin olundu.

Yarandığı ilk gündən Heydər Əliyev Fondunun, Fondun prezidenti Mehriban xanım Əliyevanın xeyirxah təşəbbüslərinin iştirakçısı kimi bu layihələrə qoşulduğuma görə bir vətəndaş, Allah adamı, xeyriyyəçi kimi mən həmişə fəxarət hissi keçirmişəm. Bakı şəhəri Xəzər rayonu Şüvəlan qəsəbəsində öz şəxsi vəsaitim hesabına inşa olunan 5 nömrəli internat məktəbinin, əsaslı təmir olunan 1 nömrəli internat məktəbinin, Masallı şəhərinin Təzəkənd kəndində, Şamaxı şəhərində tikilmiş məktəblərin açılış mərasimlərində Mehriban xanım Əliyevanın şəxsən iştirakı həmin müəssisələrin xidmətindən faydalanacaq uşaqları, onların müəllimlərini, valideynlərini son dərəcə sevindirib, böyük rəğbətlə qarşılanıb.

Avqustun 26-sı Azərbaycanın Birinci vitse-prezidenti, Yeni Azərbaycan Partiyası sədrinin birinci müavini, Heydər Əliyev Fondunun prezidenti, UNESCO-nun və ISESCO-nun xoşməramlı səfiri Mehriban xanım Əliyevanın ad günüdür. Bu əlamətdar gün münasibəti ilə çox hörmətli Mehriban xanımı səmimi qəlbdən təbrik edir, nəcib və xeyirxah amallara söykənən çoxşaxəli fəaliyyətində ona böyük nailiyyətlər və uğurlar arzulayıram.

Gülağa Tənha,

Şair-publisist

Videonu həmçinin "Tik Tok"  kanalımızdan da izləyə bilərsiniz: https://www.tiktok.com/@gulaqatenha_allah_adami/video/7407141270902033681