Olimpiyaçılarımızın qələbəsi bütün xalqımıza sevinc bəxş etdi

Uzun illərdir ki, Azərbaycan dünyada idman ölkələrindən biri kimi tanınır. 

Son illər idmançılarımızın əldə etdikləri uğurlar Vətənimizin bu beynəlxalq statusunu daha da möhkəmləndirməkdədir. 

Bir neçə gün öncə başa çatmış XXXIII Paris Yay Olimpiya Oyunlarında qazanılan 7 medal yüksək nəticə kimi qiymətləndirilir.

Respublika Prezidenti, Milli Olimpiya Komitəsinin Prezidenti İlham Əliyev avqustun 14-də XXXIII Paris Yay Olimpiya Oyunlarında medal qazanmış Azərbaycan idmançılarını və onların məşqçilərini qəbul edərkən çıxışında bunu bir daha vurğulayıb: “Olimpiya Oyunları bütün digər idman yarışları arasında xüsusi yer tutan bir yarışdır, dörd ildən bir keçirilən idman bayramıdır və əlbəttə ki, hər bir idmançı, hər bir ölkə bu Oyunlara xüsusilə hazırlaşır. Bizim Olimpiya Oyunlarındakı uğurlarımız əvvəlki illərdə də, son Oyunlarda da göstərir ki, Azərbaycan güclü idman dövlətidir. Təsadüfi deyil ki, biz bu Oyunlarda dünyanın ən güclü 30 ölkəsinin arasında yer almışıq - 2 qızıl, 2 gümüş və 3 bürünc medal, hesab edirəm ki, çox yaxşı nəticədir. İdmançıları, onların məşqçilərini bu gözəl hadisə münasibətilə bir daha təbrik etmək istəyirəm.

Onu da bildirmək istəyirəm ki, müsəlman ölkələri arasında Azərbaycan üçüncü yerdə qərarlaşıb. Nəzərə alsaq ki, İslam Əməkdaşlıq Təşkilatında 57 üzv mövcuddur, hesab edirəm, bu, çox gözəl və tarixi nəticədir. Bütövlükdə komandamızın çıxışına qiymət verərək mən hesab edirəm ki, bizim idmançılarımız ən yüksək qiymətə layiq olmalıdır.”

Bu gün respublikamızda aparılan uğurlu idman siyasəti nəticəsində dövlətimiz tərəfindən idmançılara göstərilən diqqət və qayğı – hər yarışdan sonra ölkə rəhbərinin qalib idmançılarla görüşü, onların və məşqçilərinin mükafatlandırılması, mənzil-məişət şəraitlərinin yaxşılaşdırılması və s. Azərbaycanda idman kütləviliyinə stimuldur.

Olimpiyaçılarla görüş zamanı cənab Prezident İlham Əliyev bu məsələyə daha qabarıq şəkildə toxunub: “Nəzərə alsaq ki, idmanla məşğul olmaq üçün indi ölkəmizin hər bir yerində gözəl şərait var. İdmana rəhbərlik edən qurumlar arasında koordinasiya işləri düzgün qurulub, federasiyalar, klublar uğurla fəaliyyət göstərir. Nəzərə alsaq ki, hər bir Olimpiya Oyunlarından sonra, xüsusilə ölkəmiz üçün uğurlu Oyunlardan sonra idman bölmələrinə uşaqların, yeniyetmələrin axını müşahidə olunur, mən əminəm, növbəti Olimpiya Oyunlarına hazırlıq prosesi də ardıcıl aparılacaq.”

Respublika rəhbəri çıxışında Azərbaycanda idmanın bir çox növlərinin inkişafına da diqqət çəkərək bildirdi ki, əlbəttə, tam əminəm ki, həm cüdo, həm digər idman növləri ilə məşğul olmaq istəyən uşaqlarımızın sayı çox olacaq və bunu arzulayıram. Uzun illər ərzində idmanın kütləviliyi ilə bağlı dediyim sözlər və verdiyim tapşırıqlar bir məqsədi güdür ki, fiziki, mənəvi cəhətdən sağlam, Vətənə bağlı, vətənpərvər və peşəkar gənc nəsil yetişsin. İdmançılarımızın uğurlu çıxışları bunu bir daha göstərdi ki, biz gənc nəslimizlə haqlı olaraq fəxr edə bilərik.

Bəli, öz yüksəliş dövrünü yaşayan Azərbaycan idmanı yeni zirvələri fəth edəcək. Ölkəmizdə bundan sonra da bütün növlər üzrə daha güclü idmançılar yetişəcək ki, bu da yeni nailiyyətlərimizin əldə edilməsilə sonuclanacaq. 

Əlifağa YAQUBOV,

Masallı Uşaq-Gənclər İdman-Şahmat Məktəbinin direktoru.