"Əl-Əhli"dən Vinisius Juniora astronomik təklif 

"Əl-Əhli" Vinisiusa illik 350 milyon avro maaş təklif edir

Səudiyyə Ərəbistanının "Al-Axli" futbol klubu hazırda Madrid "Real"ında forma geyinən braziliyalı forvard Vinisius Junioru düşərgəsinə qatmaq istəyir. ESPN nəşrinin yazdığına görə artıq tərəflər arasında danışıqlar gedir. Verilən məlumata görə, Ərəbistan klubu sambaçı forvarda illik əmək haqqı olaraq 350 milyon avro ödəməyə hazır olduğunu bildirib. Bu arada məlum olub ki, Madrid klubu da haqqında danışılan forvardla yollarını ayırmaq niyyətində deyil. Digər tərəfdən də "Əl-Əhli"  bununla bağlı "Real"a hələki rəsmi müraciət etməyib. Maraqlıdır ki, heç forvard özü də məsələyə rəsmi münasibət bildirməyib. Mənbənin verdiyi məlumata görə, Ərəbistan klubu Vinisiusu almaqla yanaşı, həm də onun DÇ-2034-də ölkənin futbol səfiri olmasını istəyir. 

Bu arada "Globo" nəşri daha bir məlumat yayıb. "Globo" bildirib ki, "Əl-Əhli" Vinisiusu heyətinə qatmaq üçün "Real"a milyard avro ödəməyə də hazırdır. 

Xatırladaq ki, 24 yaşlı sambaçı forvard 2018-ci ildən "Real"da forma geyinir. Ötən mövsüm. o, klubun heyətində meydana çıxdığı 39 oyunda 24 qola və 11 məhsuldar ötürməyə imza atıb. 

İNTİQAM Məmmədov