Bəybala Mirzəyev: 

Üzü dönən “politoloq”...

Fransızların və ermənilərin mövsümdən mövsümə Azərbaycan və Türkiyənin üzərinə it kimi qısqırtdıqları bir neçə növbətçi köpəklər (“politoloq”lar, “hüquq müdafiəçiləri”, deputatlar və s.) var. Bob Menendez, Nensi Pelosi, Dina Titus, Luis Moreno Okampo, Frank Şvabe və digərləri sözügedən “köpək” rolunu böyük şövqlə və canfəşanlıqla yerinə yetirirlər. Təbii ki, böyük “qonorar”ların qarşılığında. Bu “qonorar”ları onlara Fransa dövlətinin gizli fondu və erməni lobbi mərkəzləri ödəyir.

Özünü politoloq adlandıran amerikalı tarixçi, Amerika sahibkarlıq institutunun böyük elmi işçisi Maykl Rubin də həmin lobbi mərkəzlərinin və Fransa fondunun qlobal ermənipərəst köpəklər şəbəkəsinin fəal üzvlərindən biridir. Erməni lobbisi və Makron Fransası son vaxtlar bir sıra qatı anti-Azərbaycan mövqeli təbliğat köpəklərini (“yatmış” agentlərini) hərəkətə gətirdiyi kimi M.Rubini də növbəti dəfə Azərbaycanın üzərinə qısqırdıb.

Və beləliklə, tarixçi-“politoloq” Maykl Rubin, necə deyərlər, gözünü yumub, qələmi əlinə götürüb, İngiltərədə nəşr olunan məşhur “Mirror” qəzeti üçün saçma-sapan bir “məqalə” yazıb. Ağaları tapşırıb ki, döşə gəlsin, o da ağlına və ağzına gələni yazıb, öz aləmində Azərbaycanın əleyhinə nəyi var döşəyib.

Rubinin bu “məqalə”sinin ruhundan, məğzindən dərhal görünür ki, sifarişli yazıdır və sifarişin sətirlərinin altından, arxasından Makron Fransasının “barmağ”ı görünür.

Qərəzli və yalan iddialara bol-bol yer verən M.Rubin yazıb ki, Azərbaycan, ərazisi “Dağlıq Qarabağ”dan üç dəfə böyük olan Fransanın dəniz kənarında yerləşən Yeni Kaledoniyadakı separatçı etirazlara dəstəyini ikiqat artırıb. Onun fikrincə, Azərbaycanın qaz ixracından əldə etdiyi gəlirlərinin bir hissəsini Yeni Kaledoniyadakı “separat”çılıq hərəkatının maliyyələşdirilməsinə yönəltməsi “Fransanın Ermənistanın ərazi bütövlüyünü və suverenliyini Azərbaycanın təhdidlərindən qorumaq təşəbbüslərinə cavabdır”.

Rubinin bu yanaşması həqiqətlərin həyasızcasına saxtalaşdırılması, təhrif edilməsidir. Lakin görünən budur ki, “həssas ürək” sahibi olan M.Rubin aldığı qonorarın müqabilində indi də bir müddət yeni kaledoniyalıların (kanakların) qeydinə qalmağa başlayıb. Əsl həqiqətdə isə məqsəd kanakların daimi olaraq Fransanın əsarəti, müstəmləkəsi altında qalmasını təmin etməkdir. Bu baxımdan Azərbaycanın kanakların azadlıq mübarizəsini fəal surətdə dəstəkləməsi Makron kimi Rubini də çox qəzəbləndirir.

“Məqalə”dən həmçinin o da məlum olur ki, "Qərbi Azərbaycan" ifadəsi də Rubini möhkəm qıcıqlandırır. Belə ki, Rubin yazır: “Azərbaycan rəsmiləri və mediası Ermənistanı "Qərbi Azərbaycan" adlandırır və bütün ərazilərin tarixən onlara məxsus olduğunu bildirir”.

Məhz buna görə də M.Rubin Fransanın Ermənistana hərbi dəstəyinin bu gün çox vacib olduğunu bildirib və hətta ABŞ və digər ölkələrin də Fransadan nümunə götürməli olduğunu vurğulayıb.

Maykl Rubin sözügedən “məqalə”cikdə Böyük Britaniyanın və BP-nin “bostan”ına da daş atıb, onların Azərbaycanla uzun illərdir iqtisadi tərəfdaşlığı davam etdirməsinə mənfi münasibət nümayiş etdirib. O, bu yazısında belə demək mümkünsə, İngiltərə ilə Azərbaycan arasında ixtilaf yaratmağa cəhd göstərib və yeri gələrsə hətta İngiltərənin də Azərbaycana qarşı atılacaq addımlarda Fransanın yanında yer ala biləcəyini vurğulayıb.

Görünən budur ki, Rubinin bu yazını yazmaq üçün Fransadan aldığı qeyri-rəsmi qonorarın məbləği biraz çox olub, adam ifrata varıb və ona görə də Fransanı İngiltərədən daha üstün imkanlara malik bir dövlət kimi təqdim etməyə çalışıb.

Rubin kimi siniklərin bu cür ifratçı davranışları əslində gözləniləndir. Çünki onlar böyük pulları görən kimi dərhal buqələmuna dönür, cildlərini və düşərgələrini dəyişirlər. Bu mənada Maykl Rubin F.Kafkanın “Metamorfoz”una uyğun bir personajdır. Adam 2011-2012-ci illərə qədər Ermənistana nifrət bəsləyir və Ermənistanın anti-İsrail mövqeyinə görə ABŞ tərəfindən cəzalandırılmasına çağırışlar edirdi. Həmin illərdə M.Rubin Azərbaycanla bağlı müsbət mövqedən çıxış edirdi. Lakin sonradan nədənsə, Rubinin üzü birdən-birə döndü və o, Ermənistanın qatı “müdafiəçi”sinə çevrildi. Beləliklə, dünənə kimi qondarma “erməni soyqırımı”nı ciddi-cəhdlə inkar edən M.Rubin, indi də həmin “soyqırım qurbanları” üçün timsah kimi saxta göz yaşları axıtmağa başladı.

Bax belə. Bu gün Ermənistan və Fransa kimi şər dövlətlər Rubin kimi mənəviyyatsızların ümidinə qalıb.