Novak Cokovic 37 yaşında Olimpiya çempionu olub 

Parisdə (Fransa) keçirilən Yay Olimpiya Oyunlarında (Olimpiada-2024) kişi tenniscilərin fərdi yarısına final oyunu ilə yekun vurulub. Qeyd edək ki, Parisdəki "Rolan Qarros" tennis kompleksinin "Flippa Şatrie" kortunda baş tutan həlledici finalda dünyanın 2 nömrəli raketka ustası olan serbiyalı Novak Cokoviclə ATR-in reytinq cədvəlində üçüncü yeri tutan ispaniyalı Karlos Alkaras qarşılaşıb. 2 saat 52 dəqiqə davam edən qarşılaşma 37 yasli Cokovicin qələbəsi ilə başa çatıb - 7:6(7:5), 7:6(7:2). Bununla da Karyerasında üç dəfə Olimpiadanın yarımfinalında (Pekin-2008, London-2012, Tokio-2020) iştirak edən və yalnız Pekində bürünc medal qazanan Cokoviç nəhayət ki, Paris-2024-də qızıl medal qazanıb. O, bununla da Olimpiadalar tarixində qızıl medal qazanan ən yaşlı (37) tennisçi olub. Bu uqurunu karyerasında ən böyük uğur kimi dəyərləndirən Cokoviç "The Tennis Letters" nəşrinə verdiyi açıqlamasında deyib: "Əlbəttə ki, bu mənim karyeramda ən böyük uğurumdu". 

Yeri gəlmişkən, 21 yaşlı Alkaras isə Olimpiadalar tarixində finala yüksələn ən gənc tennisçi olub. "Olimpiadada gümüş medal qazanmağımla fəxr edirəm. İnanıram ki, mən İspaniyaya Olimpiadanın qızılını da aparacam" - "The Tennis "Letters" açıqlamasında deyib.

Bir məqamı da qeyd edək ki, final qarşılaşmasını Beynəlxalq Olimpiya Komitəsinin (BOK) prezidenti Tomas Bax və amerikalı tennisçi Serena Uilyams birlikdə izləyib.

İNTİQAM Məmmədov