Qadın basketbol "millimiz" Olimpiada-2024-ün qrup mərhələsində Kanadaya məğlub olsa da... 

Parisdə (Fransa) keçirilən Olimpiada-2024-də qadınlar arasında keçirilən 3x3 və Azərbaycan da daxil olmaqla planetin 8 ən yaxşı komandasının mübarizə apardığı basketbolu üzrə yarışlarda bu gün sayca 7-ci olan son turun oyunları keçirilir. Heyətində Dina Ulyanova, Tiffani Heys, Aleksandra Mollenxauer və Mersedes Uoklerin yer aldığı Azərbaycan "millisi" son tur çərçivəsində Kanada ilə qarşılaşıb. Oyun Azərbaycan komandasının 19:21 hesablı məğlubiyyəti ilə başa çatıb. Bununla belə yığmamız mübarizəni 1\4 finaldan davam etdirmək şansını hələki özündə saxlayıb. Yığmamızın taleyi son tur çərçivəsində keçiriləcək Fransa - Avstraliya və Çin - ABŞ matçının nəticəsindən asılı olacaq. Son turda daha bir oyunda isə İspaniya ilə Almaniya qarşılaşacaq.   

Xatırladaq ki, reqlamentə uyğun olaraq, qrupda ilk iki yeri tutan komanda birbaşa yarımfinala yüksəlir. Qalan 4 ən yaxşı komanda (3-6-cı yerlərin sahibləri) isə mübarizəni 1\4 finaldan davam etdirəcəklər. Yeri gəlmişkən, 1\4 final mərhələnin oyunları da bu gün keçiriləcək. 

Hazırda konadaların son durumu belədir: Almaniya – 5:1 (99), İspaniya – 4:2 (99), Аvstraliya – 4:2 (111), ABŞ – 3:3 (94), Каnada – 3:3 (107), Аzərbaycan – 2:4 (87), Çin – 2:4 (95), Fransa – 1:5 (81).

Qeyd: Azərbaycan bu növdə ilk dəfə Olimpiya Oyunlarında iştirak edir. 

İNTİQAM Məmmədov