Əli İbrahimbəyli: 

Bu gün dünya şöhrətli alim Xudu Məmmədovun doğum günüdür

"Dünya bildiyimizdən artıq bizim ola bilməz."

14 dekabr - Bu gün Azərbaycan tarixinin böyük şəxsiyyətlərindən biri, dünya şöhrətli alimimiz, bu gün yeri daha çox görünən – elm adamı və ictimai-siyasi xadim, professor, AMEA-nın müxbir üzvü, Geologiya-mineralogiya elmləri doktoru, Milli Azadlıq Qərargahı təşkilatının qurucularından (1969), Böyük Britaniya Kral Akademiyasının fəxri üzvü (1957) Xudu Məmmədovun (14 dekabr 1927, Mərzili – 15 oktyabr 1988, Bakı) doğum günüdür.

Professor Xudu Məmmədov xarakterinə, səmimiyyətinə, insanpərvərliyinə, əxlaqına və ən nəhayət, elminə görə nadir şəxsiyyətlərdən biri olub. Görkəmli kristalloqraf, təbii quruluş formaları ilə naxışlar arasında, elmi və bədii yaradıcılıq arasında əlaqələrin böyük tədqiqatçısı Xudu Məmmədov Qarabağda, Ağdamın Mərzili kəndində, ziyalı ailəsində anadan olmuşdu.

Xudu Məmmədov ilk elmşünaslarımızdan biridir. O, "Naxışların yaddaşı", "Qoşa qanad" kimi məhşur kitabların müəllifidir. Xudu müəllim bütün həyatını öz millətinin inkişafı, gələcəyi üçün sərf etmiş bir şəxsiyyətdir. Onun bir xidməti də yazdığı bir məqalə sayəsində Zəngilandakı 107 hektarlıq çinar meşəliyinin dünyada ikinci, Avropada birinci kimi tarixə düşməsidir.

Ehtiramla yad edirik!

Xudu Məmmədovdan elm, təhsil, tərbiyə haqqında 10 gözəl fikir:

1. Bilik biliyə ehtiyac yaradır.

2. Bir şeyi və hər şeyi bilən heç bir şey bilmir.

3. Müəllim yalnız dərs deyən, sadəcə, bir-iki saat sinif otaqlarında şagird və tələbələrlə təmasda olan bir şəxs, adi tərbiyəçi deyil. O, zaman və gənclik arasında körpü yaradan, öz şəxsiyyəti ilə nümunə göstərən, sabahın qurucularını hazırlayan, millətin gələcəyi üçün böyük məsuliyyət daşıyan bir varlıqdır.

4. Gənclərimizə dərindən, ümumdünya miqyasında müstəqil düşünməyi öyrətmək, hər cür fikir tənbəlliyinə, iradəsizliyə, başqalarının mülahizələrini kor-koranə yamsılamağa və bunların əsiri olmağa qarşı mübarizə aparmaq borcumuzdur. Bunsuz heç bir tərəqqi, müstəqillik, özünəməxsusluq mümkün deyil.

5. Əsil alim odur ki, danışanda elmdən uzaq olan adam onu başa düşür və ona qiymət verərək, "o nə danışır, onun dediklərini elə mən də bilirəm" deyir. Yox, "o nə danışır, mən heç nə başa düşmədim" deyirsə, deməli, o, əsil alim deyil.

6. Uşaqlara Vətəni sevməyi öyrətmək lazım deyili. Siz onlara Vətəni tanıdın, özləri sevəcəklər.

7. İllərdir ki, təhsilimizdə tətbiq olunan «yeniliklər» Avropanın, Amerikanın 50, bəzən də 80 il bundan öncə tətbiq etdikləridir. Əgər Avropa təhsili inkişaf edibsə o demək deyil ki, bu qaydalar bizi də həmin həddə çatdıracaq.

8. Dünyada öyrəniləsi sualların sayı çoxdur, lakin alim onların arasından birinci növbədə öz xalqı, öz Vətəni üçün birbaşa lazım olanını seçməlidir. Bu, eyni zamanda, dünya üçün də qiymətli olacaqdır.

9. Elm, bilik sənətkara ağlın gözləri ilə görünən aləmin üfüqlərini açır.

10. Ömür yadda qalan günlərın sayı ilə ölçülür.